AUV sekuestroi 1.641 kilogramë arra dhe kikirikë të pasigurt, ushqimi do të asgjësohet

Agjencia e Ushqimit dhe Veterinarisë (AUV), në bashkëpunim me Njësinë e Krimit Ekonomik dhe Kompjuterik në SPB Shkup, sekuestroi gjithsej 1.641 kilogramë ushqim të pasigurt nga një automjet në zonën Çuçer-Sandevë, transmeton Portalb.mk.

Inspektimi i jashtëzakonshëm u krye pas një raporti, dhe në të u gjetën sasi të mëdha ushqimi me origjinë të panjohur dhe pa dokumentacion të duhur.

AUV thotë se në automjet u gjetën 1.060 kilogramë arra të coptuara, me shumicë, dhe 581 kilogramë kikirikë me erëza djegëse, gjithashtu me shumicë.

Produktet e gjetura ishin pa identifikim dhe pa informacionin e nevojshëm për konsumatorët.

900 kilogramë arra kaju me deklaratë u gjetën gjithashtu në të njëjtën ngarkesë.

Për shkak se ato ishin pa dokumentacion të duhur për origjinën dhe cilësinë, AUV thotë se produktet janë shpallur të pasigurta dhe do të asgjësohen pa dëm, në përputhje me Ligjin për Sigurinë Ushqimore.

Agjencia thotë se është iniciuar procedurë kundërvajtjeje kundër personit të gjetur gjatë kontrollit për vendosje në treg të ushqimit të pasigurt, vendosje në treg të ushqimit nga një operator i paregjistruar dhe për mosdhënie të informacionit të nevojshëm konsumatorëve.

Kryesi i veprës penale u gjobit me 600 euro në kundërvlerë denarë.

Agjencia njofton se do të vazhdojë të kryejë kontrolle të intensifikuara në terren me qëllim parandalimin e shitjes së ushqimit të pasigurt dhe mbrojtjen e shëndetit të konsumatorëve.