Banesa më e shtrenjtë u shit në Komunën Qendër për 280 mijë euro, në tremujorin e tretë në RMV u shitën 845 apartamente
Çmimi më i lartë për metër katror i një apartamenti në tremujorin e tretë të këtij viti u arrit në Komunën Qendër, ku banesë me sipërfaqe totale prej 91 metrash katrorë u shit për 280,000 euro. Kjo do të thotë se blerësi pagoi 3,000 euro për një metër katror, sipas të dhënave të fundit nga […]
Çmimi më i lartë për metër katror i një apartamenti në tremujorin e tretë të këtij viti u arrit në Komunën Qendër, ku banesë me sipërfaqe totale prej 91 metrash katrorë u shit për 280,000 euro. Kjo do të thotë se blerësi pagoi 3,000 euro për një metër katror, sipas të dhënave të fundit nga Agjencia e Kadastrës së Pasurive të Patundshme, transmeton Portalb.mk.
Të dhënat nga Regjistri i Çmimeve dhe Qirave zbulojnë rritje të ndjeshme në tregun e ndërtimeve të reja në periudhën korrik-shtator 2025.
Në tremujorin e tretë, 845 apartamente të ndërtuara rishtas të shitura nga investitorët u regjistruan në nivel shtetëror, që është 169 apartamente më shumë krahasuar me tremujorin e dytë. Në total, Regjistri regjistroi 937 shitje nga investitorët, nga të cilat 845 ishin apartamente, 89 shtëpi dhe dy garazhe.
Krahasuar me tremujorin e dytë, ku u regjistruan 754 shitje të ndërtimeve të reja, tremujori i tretë shënoi rritje prej 183 shitjesh të reja të pasurive të paluajtshme.
Agjencia e Kadastrës thotë se deri më tani janë regjistruar 26,463 fletë ndërtimi para-regjistrimi, duke treguar se një numër i madh ndërtesash janë në ndërtim e sipër dhe së shpejti do ta pasurojnë tregun.
Analiza e shitjeve sipas llojit të pasurisë së paluajtshme tregon se numri më i madh i shitjeve i përket shitjeve të apartamenteve, me 32 përqind.
Sipas komunave, numri më i madh i apartamenteve të shitura është regjistruar në Komunën e Aerodromit të Shkupit me 275 apartamente, ndërsa Qendra është në vendin e dytë me 236 shitje. Pas tyre vijnë Çairi (133), Gazi Baba (121), Kisella Voda (114) dhe Karposhi (103).
Numri më i madh i shtëpive të shitura, megjithatë, është në Manastir me 71 shtëpi të shitura. Në qytete të tjera, Ohri regjistroi 99 shitje apartamentesh, Tetova 84 dhe Strumica 83.
Sa i përket hapësirës tregtare, shitjet më të shumta, nga 22 secila, u regjistruan në komunat e Aerodromit dhe Qendrës.
Ndryshe, në tremujorin e dytë të vitit janë shitur më pak banesa se në tremujorin e parë. Të dhënat e publikuara nga Agjencia për Kadastër të Patundshmërive për periudhën 1 prill – 30 qershor tregojnë se gjatë këtij tremujori janë shitur 676 banesa të sapondërtuara nga investitorët, që është për 178 banesa më pak krahasuar me tremujorin e parë të vitit.
