Gjermani: SPD do të votojë për marrëveshjen e koalicionit

Partia Social Demokratike (SPD) e qendrës së majtë në Gjermani ka afat deri sonte në orën 23:59 për të përfunduar votimin për marrëveshjen e koalicionit me Bashkimin Kristian Demokrat (CDU) dhe Bashkimin Kristian Social (CSU). Votimi po zhvillohet mes anëtarësisë së gjerë të partisë, e cila numëron rreth 358,000 anëtarë. Për të qenë i vlefshëm, procesi duhet të arrijë pjesëmarrje minimale prej 20%, shkruan DW, transmeton albinfo.ch.

Marrëveshja e koalicionit, e cila përfshin 144 faqe, tashmë është miratuar nga CDU-ja të hënën dhe nga partnerja e saj bavareze, CSU-ja. Nëse votimi në SPD kalon me sukses, kjo do të hapë rrugën për formimin e qeverisë së re nën udhëheqjen e kancelarit të ardhshëm, Friedrich Merz.

Merz tashmë ka emëruar disa nga figurat kyçe që do të mbajnë postet ministrore. Johann Wadephul është caktuar si ministri i ardhshëm i Jashtëm, duke pasuar Annalena Baerbock të të Gjelbërve. Ndërkohë, ekonomia në vështirësi e Gjermanisë do të kalojë në duart e Katherina Reiche, aktualisht drejtoreshë ekzekutive në Westenergie, një degë e kompanisë gjigante të energjisë E.ON.

Alexander Dobrindt nga CSU-ja është nominuar për të marrë postin e ministrit të Brendshëm.

Rezultati i votimit të SPD-së pritet të bëhet i ditur të mërkurën, dhe do të jetë vendimtar për konsolidimin e qeverisë së re të koalicionit në Gjermani, pas negociatave intensive politike që kanë zgjatur disa javë, transmeton albinfo.ch.

The post Gjermani: SPD do të votojë për marrëveshjen e koalicionit appeared first on Albinfo.