Gjykata Evropiane dënon Zvicrën: Të paraburgosurit iu mohua e drejta të shihte lindjen e fëmijës

Gjykata Evropiane për të Drejtat e Njeriut (GJEDNJ) ka konstatuar se Zvicra ka shkelur të drejtat e një të paraburgosuri, të cilit autoritetet nuk i lejuan të vizitonte partneren e tij shtatzënë dhe të ishte i pranishëm në lindjen e fëmijës, përcjell albinfo.ch.

Rasti kishte të bënte me një burrë që ndodhej në paraburgim dhe kishte kërkuar leje të përkohshme për të vizituar partneren e tij dhe për të marrë pjesë në lindjen e fëmijës. Kërkesa u refuzua nga autoritetet e burgut dhe më pas edhe nga gjykatat zvicerane.

Në vendimin e saj, GJEDNJ vlerësoi se autoritetet zvicerane nuk kishin arritur të gjenin një ekuilibër të drejtë mes nevojave të sigurisë dhe të drejtës për respektimin e jetës familjare, të garantuar me Konventën Evropiane për të Drejtat e Njeriut. Sipas gjykatës, refuzimi nuk ishte arsyetuar në mënyrë të mjaftueshme.

Vendimi nuk nënkupton ndryshim të menjëhershëm të legjislacionit zviceran, por pritet të ndikojë në mënyrën se si autoritetet do të trajtojnë raste të ngjashme në të ardhmen, sidomos kur bëhet fjalë për të drejtat familjare të personave të privuar nga liria.

The post Gjykata Evropiane dënon Zvicrën: Të paraburgosurit iu mohua e drejta të shihte lindjen e fëmijës appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.