Hungaria ndryshon Kushtetutën, goditje e re për komunitetin LGBT+ dhe shtetasit me nënshtetësi të dyfishtë

Parlamenti hungarez ka miratuar të hënën një amendament të ri kushtetues që kufizon më tej të drejtat e komunitetit LGBT+ dhe vë në shënjestër shtetasit me nënshtetësi të dyfishtë. Ndryshimet përfshijnë sanksionimin në Kushtetutë të ekzistencës së vetëm dy gjinive – mashkull dhe femër – si dhe vendosjen e përparësisë absolute të të drejtave të fëmijëve ndaj të gjitha të drejtave të tjera.

Ky veprim vjen si pjesë e një fushate të re të udhëhequr nga kryeministri nacionalist Viktor Orban, i cili në mars kishte premtuar një “pastrim të madh të Pashkëve” ndaj kundërshtarëve të tij politikë, të cilët i ka cilësuar si “insekte”. Brenda kësaj fushate, përfshihet edhe një projektligj që synon shtetasit me nënshtetësi të dyfishtë, të cilët Orban i ka quajtur “tradhtarë të kombit”.

Protesta brenda dhe jashtë Parlamentit

Amendamenti u miratua me 140 vota pro dhe vetëm 21 kundër, pavarësisht protestave të disa dhjetëra qytetarëve që u përpoqën të bllokonin hyrjen në Parlament, por u shpërndanë menjëherë nga forcat e shumta të policisë. Brenda sallës plenare, deputetët e opozitës shpalosën një pankartë në shenjë proteste, ndërsa jashtë, demonstruesit brohorisnin: “Nuk do të lejojmë që Hungaria të kthehet në Rusinë e Putinit., transmeton albinfo.ch.

Deputetja e opozitës Timea Szabo komentoi: “Kur tentuam të ndalnim reformën e parë kushtetuese në vitin 2011, nuk mendonim se do të ishim ende këtu pas 14 vitesh.”

“O burrë, o grua”

Ndryshimet e reja e përcaktojnë në mënyrë eksplicite në Kushtetutë se një person është “ose burrë ose grua”, në një ton që i ngjan një urdhri ekzekutiv të mëparshëm të nënshkruar nga presidenti amerikan Donald Trump.

Gjithashtu, Parlamenti votoi edhe një tekst tjetër që thekson se “e drejta e fëmijëve për zhvillim fizik, mendor dhe moral të duhur ka përparësi ndaj të gjitha të drejtave të tjera.” Qeveria e përdor këtë argument për të ndaluar paradat e krenarisë (Pride), në emër të “mbrojtjes së fëmijëve.”

Që nga miratimi i ligjit në mes të marsit, Budapesti është tronditur nga protesta të përjavshme, me mijëra njerëz që bllokojnë urat për orë të tëra. Protestuesit veshin gri për të simbolizuar “uniformitetin” që, sipas tyre, Orban kërkon t’i imponojë shoqërisë.

Në shënjestër edhe shtetasit me nënshtetësi të dyfishtë

Amendamenti i ri shënjestron gjithashtu ata shtetas me pasaporta të dyfishta që, sipas autoriteteve, “ndërhyjnë në punët e brendshme përmes OJQ-ve dhe mediave që pretendojnë të jenë të pavarura.”

Ligji parashikon se një shtetas hungarez me nënshtetësi të dyfishtë mund të humbasë përkohësisht shtetësinë hungareze – për një periudhë deri në dhjetë vjet – dhe në disa raste mund të përballet edhe me dëbim, me përjashtim të shtetasve nga vendet e BE-së dhe disa vendeve të tjera evropiane.

Kritikët besojnë se masa është drejtuar edhe kundër financierit dhe filantropit George Soros, 94 vjeç, i lindur në Budapest dhe me shtetësi amerikane, një prej kritikëve më të zëshëm të Orbanit.

Rreth tridhjetë juristë kanë denoncuar ligjin si një masë “pa precedent në të drejtën ndërkombëtare,” që mund të përbëjë “një formë dëbimi dhe trajtim çnjerëzor.”

The post Hungaria ndryshon Kushtetutën, goditje e re për komunitetin LGBT+ dhe shtetasit me nënshtetësi të dyfishtë appeared first on Albinfo.