IA po hyn në zyra dhe po largon punonjësit e tyre

Vetëm tre vite pas shpërthimit të gjeneratës së re të inteligjencës artificiale, drejtuesit e korporatave në SHBA po e bëjnë të qartë: revolucioni teknologjik po ndryshon rrënjësisht strukturën e punës.

Nga bankat te industria e makinave dhe tregtia me pakicë, kompani si JPMorgan, Goldman Sachs, Ford, Salesforce, Walmart, Amazon apo Klarna po njoftojnë se shumë prej pozicioneve tradicionale po zëvendësohen nga sistemet me IA.

Sipas Goldman Sachs, 6–7% e punonjësve amerikanë rrezikojnë humbjen e vendit të punës për shkak të automatizimit. Të dhënat e Stanford Digital Economy Lab tregojnë se punësimet fillestare në sektorët e ekspozuar ndaj IA janë ulur me 13%, kryesisht në zhvillimin e softuerëve, shërbimet ndaj klientit dhe punët administrative.

“Jemi në fillimin e një procesi shumëvjeçar që do të ketë ndikim të madh në tregun e punës”, paralajmëron Gad Levanon nga Burning Glass Institute.

Automatizimi nuk është risi: historia njeh shtypshkronjën, bankomatët apo kasat vetëshërbyese që kanë zëvendësuar punën njerëzore. Por ritmi i sotëm është shumë më i shpejtë.

World Economic Forum llogarit se deri në vitin 2030, IA, robotika dhe automatizimi do të zhvendosin 92 milionë vende pune, por do të krijojnë 170 milionë të reja në kërkim, zhvillim dhe siguri teknologjike.

Në praktikë, ndryshimet tashmë kanë nisur. CEO i Salesforce, Marc Benioff, tha se IA tashmë kryen deri në 50% të ngarkesës së punës në kompani, shkruan Shqip.al.

Ford parashikon që teknologjia do të “zëvendësojë gjysmën e punonjësve të zyrave”. Në Walmart, Doug McMillon beson se “IA do të ndryshojë çdo punë”.

Në bankat e mëdha, drejtuesit po urdhërojnë ndalimin e punësimeve të reja, ndërsa sistemet e inteligjencës po përdoren për vendimmarrje dhe menaxhim produktiviteti.

Edhe gjigantët e teknologjisë po ndjekin të njëjtën rrugë. Amazon pranon se do të ketë një ulje të stafit korporativ për shkak të IA, ndërsa Palantir synon të rrisë të ardhurat dhjetëfish, duke reduktuar stafin me 12%.

Klarna ka shkurtuar 40% të punonjësve, ndërsa Shopify u kërkon ekipeve të justifikojnë çdo kërkesë për personel të ri nëse IA nuk mund ta kryejë më shpejt detyrën.

Në sektorin e automobilëve, drejtuesit shohin një të ardhme ku IA do të shesë makina pa ndërhyrje njerëzore.

Një sondazh i 500 tregtarëve amerikanë nga Phyron tregon se gjysma beson se deri në vitin 2027, sistemet e inteligjencës do të merren vetë me marketingun, pyetjet e blerësve, negociatat dhe shitjen finale.

Ndërkohë, në tregun e punës, ndikimi ende nuk reflektohet plotësisht në shifra.

Pavarësisht rritjes së ngadaltë ekonomike, papunësia në SHBA mbeti 4.3% në shtator, sipas Chicago Fed. Studime nga Yale dhe New York Fed e quajnë ndikimin aktual “të kufizuar dhe të përqendruar”, por pritet që efektet të thellohen me kalimin e viteve.

Ekspertët e punësimit si Erik Brynjolfsson nga Stanford theksojnë se punët fizike, infermierë, ndërtues, teknikë, janë më të mbrojtura për momentin.

Por për punonjësit në teknologji, shërbime dhe zyrat e korporatave, sfida sapo ka nisur. “Do të ketë më shumë turbullira në të dyja drejtimet,” thotë Brynjolfsson. “Duhet të përgatisim fuqinë punëtore për epokën e re të inteligjencës artificiale.”

The post IA po hyn në zyra dhe po largon punonjësit e tyre appeared first on Ditar.al.