Kim Kardashian shkëlqen në të zeza dhe një sërë gjerdanësh në premierën e “All’s Fair” në Londër

Kim Kardashian ishte në qendër të vëmendjes në premierën britanike të serialit “All’s Fair”, që u mbajt të mërkurën në Londër, duke mahnitur të pranishmit me një fustan të zi lëkure, tepër sensual dhe elegant.

Vetëm pak ditë pas festës së saj të 45-të në Paris, ylli i “reality show”-t e ktheu sërish vëmendjen mbi trupin e saj të famshëm, të theksuar nga një fustan ngjitur pas trupit, krijim i stilistes Dilara Findikoglu.

Në këtë serial të shumëpritur të Ryan Murphy, Kim luan rolin e një avokateje të suksesshme për divorcet – një figurë e fortë dhe ambicioze në botën ligjore.

Në premierën e Parisit, të mbajtur një ditë më herët, ajo kishte zgjedhur një fustan dramatik në ngjyrë blu të hapur prej sateni, ndërsa për eventin në Londër vendosi për një pamje më të egër, me një stil gjarpëror të kombinuar me një pallto të gjatë sateni dhe shumë aksesorë argjendi.

Ylli televiziv, që është edhe producente ekzekutive e serialit, duket se mori frymëzim nga Naomi Campbell – e cila kishte veshur të njëjtën veshje më herët në pasarelën e Javës së Modës në Londër për markën e Dilara Findikoglu.

Një mbrëmje më parë, Kim kishte festuar ditëlindjen me një fustan korse nga ‘Givenchy’ në klubin “Crazy Horse” të Parisit, një tjetër pamje që tërhoqi shumë vëmendje.

Në premierën në Londër ajo u mbështet sërish nga nëna e saj, Kris Jenner, e cila u shfaq me një pamje elegante në një mantel të zi dhe këmishë të bardhë me pala.

Asaj iu bashkuan edhe bashkë-yjet e serialit – aktorja Naomi Watts, e cila kishte zgjedhur një fustan të zi sateni me prerje në kofshë, dhe Sarah Paulson, e cila kishte braktisur dukjen transparente të mbrëmjes së kaluar për një fustan jeshil të frymëzuar nga vitet ’60, të kombinuar me doreza ngjyrë vjollce.

Në trailerin e ri të “All’s Fair”, që u publikua në fillim të këtij muaji, Kim shfaqet në një rol të papritur, duke betuar se do të shkatërrojë bashkëshortin e saj të ri, i cili është martuar me të vetëm për para.

Seriali ndjek historinë e një grupi avokatesh të fuqishme që lënë firmën e tyre të dominuar nga burrat për të krijuar kompaninë e tyre të pavarur. Kardashian interpreton rolin e Allura Grant, një avokate të zgjuar dhe të pamëshirshme që përballet me sfida të mëdha profesionale dhe personale.

Përmbledhja zyrtare e serialit thotë: “Një ekip avokatesh divorci largohen nga një firmë e drejtuar nga burrat për të hapur praktikën e tyre të fuqishme. Të forta, të ndritura dhe emocionalisht komplekse, ato përballen me ndarje të vështira, sekrete skandaloze dhe aleanca që ndryshojnë vazhdimisht – si në sallën e gjyqit, ashtu edhe mes tyre.

Në një botë ku paratë flasin dhe dashuria është fushëbetejë, këto gra nuk luajnë thjesht lojën – ato e ndryshojnë atë”. /Telegrafi/