Një video me Ronald Reagan ‘ndez’ përplasjen më të fundit SHBA–Kanada

Presidenti amerikan Donald Trump ka shpallur të enjten ndërprerjen e menjëhershme të bisedimeve tregtare me Kanadanë, duke zhytur në krizë të re marrëdhëniet mes dy fqinjëve të afërt dhe partnerëve ekonomikë të Amerikës së Veriut.

Trump tha se vendimi erdhi në përgjigje të një reklame të publikuar javën e kaluar nga qeveria e provincës kanadeze Ontario, e cila përdorte audio nga një fjalim i ish-presidentit amerikan Ronald Reagan, ku kritikohej vendosja e tarifave mbi mallrat e huaja.

Në fjalimin e vitit 1987, Reagan i cilësonte tarifat si dëm për “çdo punëtor dhe konsumator amerikan”, që “nxisin luftëra tregtare të ashpra.” Por Fondacioni Ronald Reagan reagoi pas transmetimit të reklamës, duke deklaruar se klipi “keqinterpreton” fjalimin dhe se qeveria e Ontarios nuk kishte kërkuar leje për përdorimin e tij.

Mbrëmjen e së enjtes, Trump reagoi ashpër në rrjetin e tij Truth Social, duke e quajtur reklamën “të rreme” dhe “mashtruese.”

“Fondacioni Ronald Reagan sapo ka njoftuar se Kanadaja ka përdorur në mënyrë të paligjshme një reklamë FAKE, ku Reagan flet kundër tarifave,” shkroi Trump.

Ai akuzoi qeverinë kanadeze se po përpiqet të “ndërhyjë në vendimet e Gjykatës së Lartë të SHBA-së dhe gjykatave të tjera,” duke mbrojtur tarifat si “të domosdoshme për ekonominë dhe sigurinë kombëtare.”

“Bazuar në këtë sjellje të papranueshme, TË GJITHA NEGOCIATAT TREGTARE ME KANADANË NDËRPRITEN MENJËHERË,” përfundoi ai.

CNN raportoi se ka kërkuar komente nga zyra e kryeministrit kanadez Mark Carney dhe nga Dominic LeBlanc, ministri përgjegjës për tregtinë SHBA-Kanada.

Reklama ishte publikuar më 16 tetor nga kryeministri i Ontarios, Doug Ford, i cili kishte shkruar:

“Do të përdorim çdo mjet që kemi për të kundërshtuar tarifat amerikane ndaj Kanadasë. Rruga drejt mirëqenies është bashkëpunimi.”

Në fund të reklamës theksohej se ajo “nuk është aprovuar apo sponsorizuar nga Biblioteka ose Fondacioni Presidencial Ronald Reagan.” Ndërkohë, fondacioni publikoi versionin e plotë të fjalimit origjinal në YouTube, ku Reagan flet gjerësisht për përfitimet e tregtisë së lirë, duke përmendur se “më shumë se pesë milionë vende pune amerikane varen drejtpërdrejt nga eksportet.”

Marrëdhëniet SHBA-Kanada kanë qenë të tensionuara që nga kthimi i Trump në pushtet, me tarifa të ashpra mbi çelikun, aluminin, automobilat dhe drurin kanadez. Këto masa kanë goditur rëndë ekonominë e Kanadasë, e cila aktualisht përballet me nivelin më të lartë të papunësisë në nëntë vitet e fundit.

Eksperti amerikan i zinxhirit të furnizimit, Jack Buffington, tha për CNN se vendimi i Trump “është i dëmshëm për të dyja vendet.”

“Kjo është gjëja e fundit që i duhet Amerikës apo Kanadasë. Ne kemi nevojë për stabilitet në zinxhirin e furnizimit të Amerikës së Veriut, veçanërisht përballë sfidave me Kinën,” tha ai.

Pavarësisht tensioneve, marrëdhëniet kishin shënuar një përmirësim të lehtë këtë muaj, kur Trump dhe Carney u takuan në Zyrën Ovale. Takimi ishte përshkruar si “pozitiv dhe i frytshëm” nga ministri LeBlanc. Megjithatë, me vendimin e fundit të Trump, ajo periudhë e shkurtër ngrohjeje duket se ka marrë fund — të paktën për momentin.

The post Një video me Ronald Reagan ‘ndez’ përplasjen më të fundit SHBA–Kanada appeared first on Ditar.al.