Presidenti Trump: Rusia “ka të gjitha kartat”. Është e vështirë të merresh me Ukrainën

Donald Trump ka akuzuar Ukrainën se është “e vështirë të merresh me të” ndërsa përpiqet të detyrojë Kyiv të arrijë një marrëveshje paqeje me Moskën. Presidenti gjithashtu ka thënë se dëshiron që lufta të përfundojë para se të bëjë ndonjë garanci për sigurinë e Ukrainës.

Ai kritikoi Ukrainën për mosshfrytëzimin e mundësive për paqe dhe paralajmëroi se Shtetet e Bashkuara mund të rishikojnë marrwveshjet nëse Ukraina vazhdon të jetë jo bashkëpunuese.

Për të nxitur progres në negociata, dërguari i posaçëm i Trumpit për Ukrainën, Keith Kellogg, ka propozuar që ndihma ushtarake dhe ndarja e inteligjencës me Ukrainën të rinisin pasi Presidenti Volodymyr Zelensky të nënshkruajë një marrëveshje për mineralet e tokës së rrallë. Kellogg theksoi se ndalimi i ndihmës ishte pasojë e mosbashkëpunimit të Ukrainës në strategjitë e negociatave të paqes.

Ndërkohë, Presidenti Trump ka kërcënuar me sanksione të gjera ndaj Rusisë nëse nuk fillojnë menjëherë negociatat për paqe me Ukrainën. Në platformën e tij Truth Social, ai u bëri thirrje të dyja vendeve të ulen në tavolinën e bisedimeve.

Këto zhvillime kanë shkaktuar shqetësime midis aleatëve evropianë, të cilët ndihen të përjashtuar nga negociatat dhe kërkojnë të kenë një rol të drejtpërdrejtë në procesin e paqes. Ata theksojnë se çdo marrëveshje pa praninë e Ukrainës dhe Bashkimit Evropian do të ishte e papranueshme.

/ abcnews.al