‘Sekretet e zeza’ të Shtëpisë së Bardhë/ Revista Atlantic publikon të tjera biseda

Revista Atlantic publikoi të tjera tekste të ndara në grupin e bisedave për planet e luftës. Zbulimet më të fundit vijnë pasi Shtëpia e Bardhë tha se nuk ishte zbuluar asnjë informacion i klasifikuar në grupin e bisedave ndërmjet zyrtarëve të lartë amerikanë, i cili rastësisht përfshinte edhe një gazetar.

Revista Atlantic ka publikuar atë që thotë se është një kronologji e planeve të luftës të ndara nga sekretari i Mbrojtjes i SHBA-së në një grup bisedash që përfshinte gabimisht një gazetar.

Ky zbulim i fundit vjen pas një përpjekje nga Shtëpia e Bardhë për të minimizuar rrjedhjen e informacionit lidhur me planet për sulme ndaj rebelëve Houthi në Jemen, duke thënë se nuk ishte zbuluar asnjë informacion i klasifikuar.

Plani ishte ndarë në një grup bisedash në aplikacionin e mesazheve Signal, që përfshinte zyrtarë të lartë të qeverisë, përfshirë Zëvendëspresidentin JD Vance dhe Sekretarin e Mbrojtjes Pete Hegseth, si dhe një gazetar, redaktorin kryesor të Atlantic, Jeffrey Goldberg.

Ai u shtua në grupin e bisedës, të quajtur “Houthi PC small group”, më 13 mars. Sulmet përfundimisht u realizuan më 15 mars.

/ abcnews.al