Si po përpiqet BE të fitojë besimin e brezit Z

Bashkimi Europian po kërkon të afrohet me brezin Z, në një moment kur shumë të rinj e perceptojnë si një strukturë të largët dhe pak demokratike.

Një sondazh i Fondacionit gjerman TUI tregon se 40% e të rinjve mendojnë se BE nuk funksionon në mënyrë demokratike, ndërsa mbi gjysma e shohin si një ide të mirë, por të zbatuar keq.

Në zgjedhjet europiane të vitit 2024, vetëm 36% e qytetarëve 15–24 vjeç morën pjesë në votime, gjashtë pikë më pak se pesë vjet më parë. Kjo rënie reflekton apatinë politike, por edhe mungesën e ndjesisë së ndikimit në vendimmarrje.

Për të rikthyer besimin, Komisioni Europian ka nisur serinë e “Youth Policy Dialogues”, ku zyrtarë të lartë takojnë të rinj nga vende të ndryshme për të dëgjuar shqetësimet dhe idetë e tyre.

Në një takim në Bruksel, 18-vjeçarja irlandeze Aisling Giltinane dhe bashkëmoshatarë nga disa shtete diskutuan me Komisionerin Glenn Micallef mbi riskun kibernetik, duke propozuar raportim më të lehtë të rasteve, edukim më të mirë dixhital dhe përfshirje më të madhe të prindërve e mësuesve.

Këto ide do të përfshihen në Planin e Veprimit të BE-së kundër Ngacmimit Kibernetik, që pritet të prezantohet në 2026.

Por për të rinjtë, rëndësia e këtyre takimeve shkon përtej temës.

“Është mundësia për të folur drejtpërdrejt me politikanët, jo vetëm në rrjete sociale,” tha George Vella, student nga Malta. Ai shtoi se BE bën shumë për të rinjtë, por shpesh kontributi i saj nuk është i dukshëm, sepse meritën e marrin qeveritë kombëtare.

Komisioneri Micallef thekson se besimi i brezit të ri mund të fitohet vetëm përmes veprimeve konkrete, sidomos në fusha që prekin jetën e tyre, si banesat e përballueshme, cilësia e vendeve të punës dhe kostot e energjisë.

Por ekspertët kujtojnë se BE ka kompetenca të kufizuara në këto sektorë. “Në punësim apo strehim, BE mund të mbështesë e koordinojë, por jo të vendosë drejtpërdrejt,” shpjegon profesori Enrique Hernandez-Diez.

Ky kufizim ndikon në perceptimin publik, sepse shpesh politikanët vendas marrin meritat për nismat pozitive dhe fajësojnë BE-në për ato të papëlqyera.

Në thelb, sfida e BE-së është një sfidë menaxheriale: si të rikthejë besimin përmes rezultateve, jo retorikës.

Nismat si Youth Dialogues, Youth Advisory Board dhe programet e shkëmbimeve si Erasmus janë pjesë e një strategjie të re për të dëgjuar dhe përfshirë më shumë. Por suksesi i tyre do të matet nga aftësia për të krijuar mundësi reale pune dhe zhvillimi profesional.

Ndër veprimet konkrete që Bashkimi Europian ka ndërmarrë për të rinjtë gjatë dy viteve të fundit përfshihen zgjerimi i programit Erasmus+, që financoi mbi 1 milion studentë dhe praktikantë europianë në 2024.

Gjithashtu skema DiscoverEU, që ofron bileta falas treni për të udhëtuar nëpër Europë; ngritja e Bordit Këshillimor Rinor të BE-së, me përfaqësues nga të gjitha shtetet anëtare; si dhe zbatimi i “Youth Check”, një mekanizëm që vlerëson ndikimin e çdo projektligji të ri mbi brezin e ri.

Komisioni ka financuar gjithashtu mijëra projekte nën programet European Solidarity Corps dhe Youth Employment Initiative, duke mbështetur punësimin, përfshirjen sociale dhe sipërmarrjen e të rinjve në vendet me papunësi të lartë.

Siç thekson Hernandez-Diez, “demokracia mbijeton vetëm kur njerëzit ndihen pjesë e saj.”

Për Bashkimin Europian, kjo do të thotë se e ardhmja e tij politike dhe ekonomike varet nga mënyra se si arrin të menaxhojë sot marrëdhënien me brezin Z. Shqip.al

The post Si po përpiqet BE të fitojë besimin e brezit Z appeared first on Ditar.al.