Toshkovski: U raportuan 30 raste fushate, ryshfeti, pengim i votimit dhe kërcënime
Ministri i Brendshëm Pançe Toshkovski njoftoi se dita e zgjedhjeve e raundit të dytë të zgjedhjeve lokale kaloi në mënyrë paqësore dhe pa incidente apo trazira serioze, duke shtuat se u raportuan disa raste për fushatë pranë qendrave të votimit, prani e paautorizuar në një qendër votimi, ryshfeti i mundshëm gjatë zgjedhjeve dhe votimit dhe […]
Ministri i Brendshëm Pançe Toshkovski njoftoi se dita e zgjedhjeve e raundit të dytë të zgjedhjeve lokale kaloi në mënyrë paqësore dhe pa incidente apo trazira serioze, duke shtuat se u raportuan disa raste për fushatë pranë qendrave të votimit, prani e paautorizuar në një qendër votimi, ryshfeti i mundshëm gjatë zgjedhjeve dhe votimit dhe raste të tjera, raporton Portalb.mk.
“Dita e zgjedhjeve kaloi pa incidente serioze. Ky është një tjetër konfirmim se qytetarët, institucionet dhe Ministria e Brendshme treguan pjekuri dhe përgjegjësi, dhe Maqedonia pati një nga zgjedhjet më paqësore në histori. Shprehim mirënjohjen tonë për të gjithë zyrtarët e policisë, si dhe për të gjithë pjesëmarrësit në procesin zgjedhor. Votimi filloi në kohë në të gjitha qendrat e votimit, përveç në 9 ku filloi me vonesa të vogla, ndërsa në 8 qendra votimi pati ndërprerje të përkohshme të votimit” tha Toshkovski.
Ai shtoi se sot u raportuan gjithsej 30 ngjarje, kryesisht në Shkup. Raportimet më të shpeshta ishin për fushatë pranë qendrave të votimit në gjithsej shtatë raste, të ndjekura nga ryshfeti i mundshëm gjatë zgjedhjeve dhe votimit në 5 ngjarje, prani e paautorizuar në një qendër votimi me katër raportime. U vunë re raste të izoluara të pengimit të votimit, fotografimi i një fletëvotimi, fotografimi i paautorizuar i qytetarëve, si dhe ngjarje individuale me kërcënime. Pas kontrolleve të ndërmarra, në 19 nga 26 raste, pretendimet nuk u konfirmuan, ndërsa në rastet e tjera janë përgatitur procesverbale dhe janë marrë masa të përshtatshme. Në katër raste, kontrollet janë duke u zhvilluar aktualisht.
“Sektori i Krimit Kibernetik ka regjistruar 18 postime në rrjetet sociale, të cilat po analizohen dhe po veprohet sipas procedurave ligjore. Të gjitha raportet u përpunuan me përgjegjësi dhe profesionalizëm të plotë. Gjëja më e rëndësishme është që dita kaloi në paqe, pa incidente serioze. Ky është një sukses i përbashkët për të gjithë. Sot kemi treguar edhe një herë se Maqedonia mund të organizojë zgjedhje siç u ka hije të gjitha demokracive moderne”, tha Toshkovski.
Sot u zhvillua rrethi i dytë i zgjedhjeve lokale, ndërsa dje votuan personat e sëmurë dhe të paaftë si dhe për të burgosurit. Votimi dje dhe sot ka kaluar pa ndonjë incident.
