A e dëmton melatonina shëndetin e zemrës?

Mos u alarmoni nga lajmet që lidhin melatoninën me dështimin e zemrës. Ky është mesazhi pas disa raporteve që u bazuan në një studim paraprak mbi suplementin e gjumit, i cili ngriti pyetje mbi sigurinë e përdorimit afatgjatë të tij për trajtimin e pagjumësisë.

Mjekët e dinë se gjumi i pamjaftueshëm ose i ndërprerë rrit rrezikun e sëmundjeve të zemrës, por ekspertët theksojnë se ky lloj studimi vëzhgues nuk mund të provojë se melatonina është shkaku, dhe jo vetë pagjumësia që trajtohet. “Nuk duhet t’u themi pacientëve të ndalojnë menjëherë përdorimin e melatoninës,” tha kardiologu Pratik Sandesara nga Emory Healthcare.

Trupi ynë prodhon natyrshëm melatoninë, hormon që rregullon ciklin e gjumit, duke u rritur në mbrëmje dhe duke shkaktuar përgjumje. Melatonina sintetike merret për të fjetur më lehtë ose për të përballuar ndryshimet e orës biologjike.

Studimi analizoi të dhëna ndërkombëtare shëndetësore të të rriturve me diagnozë pagjumësie që kishin përdorur melatoninë për të paktën një vit. Brenda pesë vjetësh, 4.6% e tyre zhvilluan dështim të zemrës, krahasuar me 2.7% të atyre që nuk e kishin përdorur. Por studimi ende nuk është rishikuar nga ekspertë.

Në disa vende, melatonina kërkon recetë, por në SHBA shitet pa të, që do të thotë se shumë përdorues nuk përfshihen në të dhëna. Për më tepër, suplementet nuk janë të rregulluara nga qeveria, kështu që përmbajtja ndryshon sipas markës. Studiuesit nga SUNY Downstate thanë se nevojiten kërkime të mëtejshme.

Pacientët duhet të këshillohen me mjekun e tyre; zakonisht rekomandohet përdorimi afatshkurtër. Ekspertët shtojnë se higjiena e mirë e gjumit, si shmangia e dritës blu gjatë natës, është çelësi për gjumë më të shëndetshëm dhe për uljen e rrezikut për zemrën. / The Associated Press

The post A e dëmton melatonina shëndetin e zemrës? appeared first on Konica.al.