BE dhe Franca shpallin fondin prej 500 milionë eurosh për shkencën, në sfondin e krizës akademike në SHBA

Bashkimi Evropian dhe Franca kanë shpallur një paketë stimujsh prej 500 milionë eurosh me synimin për të tërhequr studiues dhe shkencëtarë ndërkombëtarë në Evropë, në një moment kur Shtetet e Bashkuara po përballen me kriza të thella në arsimin e lartë dhe konflikt mes administratës Trump dhe universiteteve kryesore.

Presidentja e Komisionit Evropian, Ursula von der Leyen, dhe presidenti francez Emmanuel Macron bënë njoftimin të hënën gjatë një konference në Universitetin Sorbonne në Paris, ku u bënë thirrje kërkuesve shkencorë nga e gjithë bota që të zhvendosen në Evropë për të punuar në kushte të lirisë akademike dhe mbështetjes institucionale.

“U bëjmë thirrje studiuesve në mbarë botën: nëse e doni lirinë, ejani dhe na ndihmoni të qëndrojmë të lirë,” deklaroi Macron.

Paketa financiare përfshin fonde për projekte kërkimore si dhe ndihmë për universitetet evropiane për të mbuluar kostot e sjelljes së studiuesve të huaj. Von der Leyen theksoi gjithashtu synimin që vendet anëtare të BE-së të rrisin investimet në kërkim dhe zhvillim në 3% të Prodhimit të Brendshëm Bruto deri në vitin 2030.

Franca do të kontribuojë me 100 milionë euro në këtë nismë, megjithëse ende nuk është e qartë nëse kjo shumë është shtesë ndaj fondit të përgjithshëm të BE-së apo pjesë e tij.

Ky njoftim vjen në një kohë kur presidenti amerikan Donald Trump ka shkaktuar përplasje të forta me sektorin universitar amerikan përmes masave si ngrirja e fondeve federale, anulimi i vizave për studentët ndërkombëtarë dhe nisja e hetimeve ndaj disa prej universiteteve më prestigjioze të SHBA-së.

Zyrtarët evropianë shpresojnë se situata aktuale në SHBA do të nxisë një “rrjedhje të trurit” drejt Evropës, ku liria akademike dhe mbështetja financiare për kërkimin shkencor konsiderohen përparësi strategjike. / abcnews.al