Bullgaria vazhdon rrugën drejt euros, pritet miratimi nga KE për përdorimin e monedhës prej 1 janar 2026

Bullgaria pritet të marrë miratimin këtë javë nga Komisioni Europian dhe Banka Qendrore Europiane për të futur euron në përdorim nga 1 janari 2026. Ky vendim vjen pas vonesave të shumta, përfshirë protestat kundër euros dhe një incidenti të rëndë me zjarrvënie ndaj ndërtesës së Komisionit Europian në Sofje.

Miratimi i euros është një kusht për anëtarësimin e Bullgarisë në BE, por është vonuar për shkak të dështimeve legjislative, përfshirë reformat për luftën kundër pastrimit të parave dhe shqetësimeve për inflacionin. Megjithatë, më 4 qershor, Bullgaria pritet të marrë një vlerësim pozitiv për gatishmërinë e saj për të kaluar në përdorimin e euros.

Ky do të ishte hapi i dytë i madh për Bullgarinë drejt integrimit të plotë në BE, pas pranimit në Zonën Schengen në janar të këtij viti. Bullgaria hyri në BE në 2007 dhe, sipas traktatit të pranimit, u angazhua të adoptojë euron, por ky proces ka hasur vonesa për shkak të krizës financiare dhe falimentimit të një banke të madhe bullgare në 2014. Vetëm në vitin 2020, Bullgaria u bë anëtare e Mekanizmit Europian të Kursit të Këmbimit (ERM II), faza e “pritjes” për euron.

Gjatë periudhës së pasigurisë politike, Bullgaria ka realizuar reforma kundër korrupsionit dhe ka përfshirë këtë temë në agjendën e qeverisë, me politikanë pro-perëndimorë tani në parlament, duke ofruar shpresa për një avancim më të shpejtë në rrugën drejt euros. / abcnews.al