Krum Efremov do të jetë ambasador i Maqedonisë së Veriut në Sofje

Përgatitjet për emërimin e diplomatit Krum Efremov si ambasador i Maqedonisë së Veriut në Sofje janë në proces, bëri të ditur ministri i Punëve të Jashtme dhe Tregtisë së Jashtme, Timço Mucunski, gjatë një konference për media njofton INA.

Mucunski tha se procedura për emërimin e ambasadorit në Sofje tashmë ka kaluar fazën e klasifikuar dhe bëri të ditur publikisht emrin e kandidatit.

“Ambasadori ynë në Bullgari do të jetë Krum Efremov, diplomat profesionist dhe një nga diplomatët më cilësorë, sipas mendimit tim. Ai aktualisht është drejtor i Drejtorisë për Diplomaci Ekonomike në Ministri dhe më herët ka shërbyer si ambasador i vendit tonë në Ukrainë. Ai do të jetë ambasadori ynë në Sofje. Aktualisht po zhvillohen përgatitjet për nisjen e tij drejt Sofjes”, deklaroi Mucunski.

Ministri rikujtoi se me ndryshimet dhe plotësimet e Ligjit për Punët e Jashtme, të propozuara nga kjo Qeveri dhe të miratuara nga Kuvendi, është garantuar përfaqësimi i diplomatëve profesionistë si drejtues të përfaqësive diplomatike dhe konsullore.

Sipas Mucunski, të paktën 50 për qind e ambasadorëve dhe konsujve të përgjithshëm duhet të jenë diplomatë profesionistë nga Ministria e Punëve të Jashtme.

Ai theksoi se praktika që nga formimi i Qeverisë aktuale tregon një përqindje edhe më të lartë, pasi mbi 60 për qind e kandidatëve për ambasadorë dhe konsuj të përgjithshëm kanë qenë diplomatë profesionistë.

“Pra, jo vetëm që respektohet zgjidhja ligjore, por po shkojmë edhe përtej minimumit që kemi përcaktuar, i cili është vendosur në një prag kaq të lartë”, tha Mucunski.

I pyetur për propozimin e ambasadorit të ri në Athinë, për të cilin kanë raportuar disa media, Mucunski tha se nuk mund të komentojë, pasi procedura është ende në fazën e klasifikuar dhe për këtë arsye nuk mund të bëhet i ditur emri i kandidatit./INA/

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.