Grabitja spektakolare në Muzeun e Luvrit, dy të arrestuarit pranojnë autorësinë! Bizhuteritë ende nuk janë gjetur

Dy persona të arrestuar në lidhje me vjedhjen e bizhuterive të kurorës franceze nga muzeu i Luvrit kanë pranuar përfshirjen e tyre në grabitje dhe janë lënë në paraburgim, bëri të ditur të mërkurën Prokuroria e Parisit.

Sipas prokurores së Parisit, Laure Beccuau, bizhuteritë e vjedhura ende nuk janë në posedim të autoriteteve. Dy të dyshuarit pritet të dalin para një gjyqtari hetues dhe mund të vendosen nën hetim të plotë më vonë gjatë ditës së mërkurë.

Grabitja, një sulm i guximshëm shtatëminutësh në mes të ditës në Galerinë “Apollo” të Luvrit tërhoqi vëmendjen e botës pasi hajdutët arritën të arratiseshin me bizhuteri me vlerë dhjetëra milionë eurosh.

Dy burrat u arrestuan të shtunën në mbrëmje dhe u mbajtën në paraburgim për 96 orë. Dy persona të tjerë të përfshirë në grabitje mbeten ende në arrati.

I dyshuari i parë, 34 vjeç, me shtetësi algjeriane, kishte precedentë penalë për shkelje në trafik dhe u identifikua përmes ADN-së së gjetur në një nga skuterët e përdorur në grabitje.

I dyshuari i dytë, 39 vjeç, banues në Aubervilliers, periferi e Parisit, punonte si shofer i paligjshëm taksie dhe shpërndarës. Ai ishte i njohur më parë nga policia për vjedhje të rëndë. ADN-ja e tij u gjet në një copë xhami të thyer nga një prej vitrinave të ekspozitës, sipas prokurorisë.

“Nuk ka asnjë tregues që katër autorët të kenë pasur ndihmë nga brenda muzeut,” deklaroi Beccuau.

“Ata ndodhen aktualisht para një gjyqtari hetues për t’u vendosur nën hetim të plotë për grabitje si pjesë e një bande të organizuar – vepra që dënohen me deri në 15 vite burg dhe një gjobë të rëndë,” shtoi ajo.

Më shumë se 100 hetues janë përfshirë në ndjekjen e autorëve. Autoritetet arritën t’i identifikonin pas analizës së mbi 150 mostrave të ADN-së dhe disa sendeve të lëna pas në vendngjarje, përfshirë doreza, një helmetë dhe jelekë reflektues.

Njëri prej burrave u arrestua në aeroportin “Charles de Gaulle” ndërsa përpiqej të largohej nga vendi. Ai u ndalua gjatë kontrollit të pasaportës përpara se të hipte në një fluturim mbrëmjeje për në Algjeri.

Bizhuteritë e vjedhura, ndër to një varëse smeraldi me mbi 1,000 diamante, dhuratë e Napoleonit për gruan e tij të dytë, nuk janë gjetur gjatë arrestimeve.

Grabitja ndodhi më 19 tetor, kur hajdutët përdorën një shkallë të montuar në kamion për të hyrë në Galerinë “Apollo” në katin e sipërm të Luvrit, ku ruhen bizhuteritë e kurorës franceze. Ata thyen dy vitrina sigurie dhe morën nëntë objekte, përfshirë një set bizhuterish me diamante e safirë që dikur i përkisnin Mbretëreshës Marie-Amélie dhe Mbretëreshës Hortense.

Vlera e përgjithshme e bizhuterive të vjedhura vlerësohet në 88 milionë euro (rreth 102 milionë dollarë).

The post Grabitja spektakolare në Muzeun e Luvrit, dy të arrestuarit pranojnë autorësinë! Bizhuteritë ende nuk janë gjetur appeared first on Ditar.al.