Incident i këndshëm në Panairin e Librit: Jam Mysliman mbaron brenda 30 minutash

Incident i këndshëm në Panairin e Librit: Jam Mysliman mbaron brenda 30 minutash

Një situatë e pazakontë, por tepër pozitive, u regjistrua dje rreth orës 18:00 në Panairin e Librit, ku romani **“Jam Mysliman”** u shit plotësisht brenda vetëm 30 minutash. Autori, i cili ndodhej në stendë për të dhënë autografe, pati me vete rreth 500 kopje, të cilat u mbaruan në një kohë rekord.

Për të përballuar kërkesën e lartë, punonjësit e shtëpisë botuese *Onufri* u detyruan të shkonin me urgjencë drejt shtypshkronjës, duke kaluar mes trafikut, për të siguruar kopje shtesë. Ndërkohë, dhjetëra lexues qëndruan në këmbë për rreth 40 minuta, duke pritur mbërritjen e romanit.

Autori u shpreh thellësisht mirënjohës për durimin dhe mbështetjen e tyre:

> “Jam i impresionuar nga lexuesit që pritën bashkë me mua. I falenderoj të gjithë dhe ju kërkoj ndjesë për situatën. Besoj se sot libri nuk do të mungojë.”

Ai konfirmoi se do të jetë sërish i pranishëm në Panair, për të takuar lexuesit e tij të vjetër dhe të rinj, të cilët prej 17 vitesh e kanë ndjekur në çdo botim dhe çdo aventurë të re letrare.

Autori e cilësoi ditën e djeshme si “një nga më të bukurat”, duke theksuar se pamja e lexuesve që prisnin në radhë për librin i dha energji dhe emocion të veçantë.

> “Pesha e këtij romani është më e lehtë kur e ndajmë bashkë,” – tha ai në përfundim.