Paris: Qytetarët do të vendosin për mbylljen e qindra rrugëve për qarkullim të veturave

Parisienët kanë nisur një konsultim publik të rëndësishëm që do të vendosë nëse qindra rrugë në kryeqytetin francez do të mbyllen për makinat. Nëse vota do të jetë pozitive, 500 rrugë do të konvertohen në zona pedonale dhe do të gjelbërohen, duke humbur 10,000 vende parkimi.

Qendrat e votimit për referendumin u hapën në orën 9:00 të mëngjesit dhe parizianët, përfshirë 16 dhe 17-vjeçarët për herë të parë, mund të votojnë deri në orën 19:00. Rreth 1.4 milionë qytetarë janë të thirrur të shprehin mendimin e tyre në këtë proces që ka të bëjë me të ardhmen e transportit dhe mbrojtjen e mjedisit në Paris, shkruan SRF.

Ende nuk është vendosur saktësisht se cilat rrugë do të mbyllen, por aktualisht 220 nga mbi 6000 rrugë të Parisit janë tashmë zona pa makina, veçanërisht ato afër shkollave. Ndërkohë, qyteti ka kufizuar shpejtësinë në shumë zona në 30 km/h dhe disa pjesë të qendrës së Parisit janë mbyllur për trafikun.

Për shumë vite, trafiku i makinave në Paris ka rënë, dhe ecja është bërë mjeti më i zakonshëm i transportit. Ky referendum është hera e tretë që parizianët votojnë për çështje të transportit. Pak më shumë se një vit më parë, shumica e votuesve mbështetën rritjen e tarifave të parkimit për automjetet e rënda, ndërsa dy vjet më parë, qytetarët vendosën të ndalojnë dhënien me qira të e-skuterëve.

Kryetarja e Parisit, Anne Hidalgo, e cila është një mbështetëse e fuqishme e projektit, ka shprehur dëshirën për ta bërë qytetin më të gjelbër dhe më të shëndetshëm, duke e bërë transportin më të qëndrueshëm dhe duke përmirësuar cilësinë e jetesës për banorët, transmeton albinfo.ch.

The post Paris: Qytetarët do të vendosin për mbylljen e qindra rrugëve për qarkullim të veturave appeared first on Albinfo.