Praktikat e dhimbshme ndaj kafshëve do të deklarohen në produktet ushqimore në Zvicër

Nga data 1 korrik, praktikat që shkaktojnë dhimbje te kafshët do të duhet të deklarohen qartë në paketimin e produkteve ushqimore. Këshilli Federal zviceran ka miratuar një seri urdhrash të reja për etiketimin e mishit, vezëve dhe foie gras-it, me qëllim rritjen e transparencës për konsumatorët.

Në supermarketet zvicerane, mishi i kalit, lepurit apo qengjit është pothuajse gjithmonë me origjinë të huaj. Në deklaratën e qeverisë theksohet se konsumatorët do të kenë mundësinë të informohen nëse produktet që blejnë janë prodhuar përmes metodave që përfshijnë praktika të dhimbshme për kafshët – si për shembull pa anestezi.

Çfarë përfshihen si praktika të dhimbshme?

Shembuj të tillë janë kastrimi ose heqja e brirëve te gjedhët pa anestezi, apo prerja e bishtit, dhëmbëve apo kastrimi te derrat, gjithashtu pa anestezi. Një tjetër shembull është prerja e këmbëve të bretkosave pa përdorur qetësues.

Edhe mëlçia dhe mishi i rosës apo patës së majmur me zor do të duhet të etiketohet si i tillë. Kjo metodë prodhimi ka qenë e ndaluar në Zvicër për më shumë se 40 vjet, por importet nga jashtë janë ende të lejuara. Masa është pjesë e kundërpropozimit të Këshillit Federal ndaj një nisme popullore që synon ndalimin e plotë të importit të foie gras-it nga zogj të dhunuar, transmeton qlbinfo.ch.

Të gjitha subjektet që ofrojnë këto produkte përfshirë restorantet, dyqanet e vogla dhe marketet do të kenë detyrimin të kontrollojnë vetë nëse i nënshtrohen këtij rregulli deklarimi.

Sipas Këshillit Federal, kjo rritje e transparencës “i lejon konsumatorët të bëjnë zgjedhje të informuara.” Parashikohet një periudhë kalimtare prej dy vjetësh për zbatimin e plotë të rregullores.

Edhe lëkurat e kafshëve nën rregulla të reja

Nga 1 korriku, ndalohet gjithashtu importi i lëkurave dhe produkteve prej tyre që vijnë nga kafshë të trajtuara në mënyrë mizore. Dyqanet e specializuara, butiqet e modës dhe shitësit online do të duhet të deklarojnë mënyrën e prodhimit të artikujve dhe të ofrojnë prova që origjina përputhet me kërkesat ligjore.

Sot, deklarimi i detyrueshëm i produkteve të lëkurës kërkon vetëm informacion mbi llojin e kafshës, burimin dhe vendin e origjinës. Por sipas autoriteteve, industria e lëkurës dhe tregtarët me pakicë nuk i përmbahen mjaftueshëm këtyre kërkesave: vetëm në vitin 2023, në rreth 60% të kontrolleve u konstatuan parregullsi. Produktet e ndaluara do të tërhiqen nga tregu dhe shkelësit do të ndëshkohen.

Nisma për ndalimin e lëkurës u refuzua

Në të njëjtën kohë, Këshilli Federal i ka dërguar Parlamentit një mesazh zyrtar lidhur me nismën popullore “Po ndalimit të importit të produkteve të lëkurës nga kafshë të keqtrajtuara”. Qeveria e refuzon tekstin e nismës të propozuar nga Aleanca Zvicerane për Kafshët, megjithëse e mirëkupton synimin e saj. Si alternativë, Këshilli Federal propozon një kundërpropozim indirekt që do të ndalojë importin, tranzitin dhe tregtinë e produkteve të lëkurës të prodhuara përmes metodave mizore, duke e përfshirë këtë ndalim në Ligjin Federal për Mbrojtjen e Kafshëve.

The post Praktikat e dhimbshme ndaj kafshëve do të deklarohen në produktet ushqimore në Zvicër appeared first on Albinfo.