The Kenya Times: Grindje diplomatike pasi Serbia reagon ndaj njohjes së Kosovës nga Kenia

Qeveria e Serbisë është përgjigjur pas vendimit të Kenias për të njohur Kosovën si shtet të pavarur, raporton mediumi i Kenias, “The Kenya Times”, për ngjarjen e djeshme.

Në një deklaratë të lëshuar nga Ministria e Punëve të Jashtme të Serbisë, Beogradi dënoi Kenian për vendimin, duke e quajtur atë shkelje të së drejtës ndërkombëtare dhe shkelje të Rezolutës 1244 të Këshillit të Sigurimit të Kombeve të Bashkuara.

Më tej, Ministria kritikoi Kenian për shpërfilljen e Kartës së OKB-së dhe “minimin e përpjekjeve drejt stabilitetit dhe dialogut rajonal”.

Duke e përshkruar vendimin si “për keqardhje”, Beogradi paralajmëroi se vendimi mund të dëmtojë marrëdhëniet e tij tradicionalisht të forta me Nairobin, të cilat janë ndërtuar gjatë dekadave.

“Ky veprim vendos një precedent për keqardhje në marrëdhëniet tradicionalisht miqësore midis Serbisë dhe Kenias – marrëdhënie që janë ndërtuar gjatë dekadave mbi parimet e respektit dhe bashkëpunimit të ndërsjellë”, thuhet në një pjesë të deklaratës.

Serbia gjithashtu hodhi poshtë çdo justifikim të bazuar në opinionin këshillues të Gjykatës Ndërkombëtare të Drejtësisë (GJND) të vitit 2010, duke argumentuar se ajo nuk legjitimon shpalljen e njëanshme të pavarësisë së Kosovës.

Serbia përgjigjet

Beogradi, në të njëjtën kohë, theksoi se 28 vende e kanë tërhequr ose pezulluar njohjen e pavarësisë së Kosovës në vitet e fundit, duke theksuar se shumica e bashkësisë ndërkombëtare mbetet mbështetëse e pretendimeve territoriale të Serbisë.

Qeveria serbe është zotuar të intensifikojë përpjekjet diplomatike për të kundërshtuar njohjen e Kosovës dhe “për të mbrojtur sovranitetin e saj” përmes të gjitha kanaleve ligjore në dispozicion, pavarësisht vendimit të Kenias, raporton ky medium.

“Ne gjithashtu theksojmë se gjatë tetë viteve të fundit, njëzet e tetë vende e kanë tërhequr ose pezulluar njohjen e pavarësisë së shpallur në mënyrë të njëanshme të të ashtuquajturës Kosovë, ndërsa vetëm dy shtete të reja kanë dhënë njohje”, thuhet në njoftimin e Ministrisë.

“Shumica e qartë e bashkësisë ndërkombëtare, së bashku me ligjin dhe drejtësinë, mbeten në anën e Serbisë.

Republika e Serbisë ka paralajmëruar se do të marrë të gjitha masat e nevojshme diplomatike dhe politike “në përgjigje të këtij akti të papranueshëm dhe jomiqësor”.

Kenia e njeh Kosovën

Kjo vjen pasi presidenti William Ruto të mërkurën, më 26 mars, nënshkroi një letër që e njeh Kosovën si një komb të pavarur gjatë një takimi me dyer të mbyllura në Shtëpinë e Shtetit, në Nairobi.

“Nënshkrimi i letrës së njohjes nënkuptoi që Kenia e njohu zyrtarisht shtetin e shkëputur ballkanik si një shtet të pavarur, duke u bërë vendi i parë që e bën këtë pas gati pesë vitesh përpjekjesh të ngecura për të fituar njohje të mëtejshme ndërkombëtare”, shkruan “The Kenya Times”.

Ish-presidenti i Kosovës, Behgjet Pacolli, në një deklaratë teksa ndau fotot me presidentit Ruto duke e nënshkruar letrën, e cilësoi atë si një “ceremoni të jashtëzakonshme”.

“17 vjet pas Pavarësisë, në një ceremoni të jashtëzakonshme dhe të paharrueshme, Republika e Kenisë – një nga vendet më të rëndësishme në Afrikë – e njohu zyrtarisht Republikën e Kosovës si shtet të pavarur dhe sovran!”, ka thënë Pacolli.

“Kjo njohje nuk është vetëm një deklaratë – është një fitore e madhe për shtetin e Kosovës, është zëri i lirisë sonë që dëgjohet thellë në zemër të Afrikës! Sot flamuri ynë shtetëror valon me krenari në Nairobi dhe kjo është dëshmi se Kosova ecën përpara, e fortë dhe me dinjitet kur punohet dhe vullneti!”

Ish-presidenti shtoi se ai kishte lobuar për njohjen e Kosovës nga Kenia që nga viti 2009.