Trump kërcënon sërish Spanjën, por Madridi dhe NATO nuk shqetësohen

Zyrtarë të lartë brenda NATO-s dhe qeverisë spanjolle nuk po e marrin shumë seriozisht kërcënimin e presidentit të SHBA-së, Donald Trump, për të ndëshkuar Spanjën për shkak të shpenzimeve të ulëta në mbrojtje.

“Kërcënimi nuk po merret seriozisht në nivel ushtarak,” tha një oficer i lartë i NATO-s në selinë Supreme Allied Powers Europe në Bruksel.

Ky reagim vjen ndërsa retorika e Trump është bërë gjithnjë e më armiqësore javët e fundit, duke kritikuar Spanjën për shpenzimet e saj të ulëta në mbrojtje, në kuadër të përpjekjeve të administratës amerikane për t’i bërë vendet evropiane më pak të varura nga ombrella ushtarake e SHBA-së.

“Do t’ju duhet të flisni me Spanjën,” i tha Trump sekretarit të përgjithshëm të NATO-s, Mark Rutte, të mërkurën. “Spanja nuk po luan si pjesë e ekipit.”

Trump ka kërkuar që vendet anëtare të NATO-s të shpenzojnë të paktën 5 për qind të PBB-së së tyre për mbrojtjen kombëtare. Në samitin e NATO-s të mbajtur në Hagë në qershor, shumica e vendeve anëtare ranë dakord për këtë objektiv deri në vitin 2035, 3.5 për qind për shpenzime ushtarake thelbësore dhe 1.5 për qind në fusha mbështetëse si infrastruktura e mobilitetit ushtarak.

Por Spanja kërkoi përjashtim, duke mbetur vendi me shpenzimet më të ulëta ushtarake ndër anëtarët e NATO-s, vetëm 1.3 për qind të PBB-së në vitin 2024.

Refuzimi i saj për t’u angazhuar për më shumë ka irrituar Trump-in, i cili këtë muaj tha se NATO duhet të shqyrtojë madje përjashtimin e Spanjës nga aleanca. Zemërimi i presidentit ka shtuar tensionet në marrëdhëniet tashmë të ndërlikuara transatlantike, të cilat ai i ka tronditur me tarifa të reja tregtare dhe me kritika ndaj liderëve evropianë për emigracionin dhe ndryshimet klimatike.

Ndërkohë, liderët evropianë janë përpjekur të ruajnë marrëdhënie pozitive me Trump, me shpresën se do të mund ta ndikojnë atë në çështje të rëndësishme, veçanërisht në lidhje me luftën në Ukrainë.

Trump gjithashtu ka lënë të kuptohet se mund të vendosë të reja tarifa ndaj Spanjës, edhe pse vendi është pjesë e Bashkimit Evropian. Nuk është e qartë si mund të zbatohej një masë e tillë, por për momentin Madridi duket se nuk është i shqetësuar.

“Ajo që ka rëndësi dhe duhet ta themi me krenari, është se Spanja është një aleate e besueshme dhe përgjegjëse. Është pjesë e Aleancës së Atlantikut prej 40 vitesh, ka paguar një çmim të lartë me jetën e ushtarëve të saj, merr pjesë në çdo mision dhe po bën përpjekje të rëndësishme në industrinë e mbrojtjes,” deklaroi ministrja spanjolle e Mbrojtjes, Margarita Robles.

“Edhe nëse disa nuk e pranojnë, Spanja është një vend që mban fjalën dhe një aleate e respektuar nga të gjithë anëtarët e Aleancës,” shtoi ajo.

Robles theksoi gjithashtu se viti 2035 është ende larg dhe se prioriteti i NATO-s duhet të jetë situata në Ukrainë.

Megjithatë, sipas zëdhënëses së Shtëpisë së Bardhë, Anna Kelly, Trump mbetet i fokusuar tek qëndrimi i Spanjës dhe po “shqyrton pasoja ekonomike”.

The post Trump kërcënon sërish Spanjën, por Madridi dhe NATO nuk shqetësohen appeared first on Ditar.al.