Trump pezullon hyrjen e studentëve të huaj në Harvard për gjashtë muaj

Administrata e presidentit amerikan Donald Trump ka lëshuar një urdhër presidencial që pezullon për gjashtë muaj hyrjen e studentëve të huaj në SHBA, të cilët kanë si qëllim të studiojnë ose të marrin pjesë në programe shkëmbimi në Universitetin e Harvardit. Trump e justifikoi këtë vendim me arsye të sigurisë kombëtare, duke thënë se prania e tyre është “e dëmshme për interesat e SHBA-së”.

Në urdhrin e tij, Trump akuzon Harvardin për bashkëpunim të thelluar me vende të huaja, shkelje të të drejtave civile dhe për mosraportim të aktiviteteve të dyshimta të disa studentëve të huaj. Ai kërkon gjithashtu që Sekretari i Shtetit të shqyrtojë revokimin e vizave ekzistuese të studentëve ndërkombëtarë të Harvardit.

Universiteti i Harvardit ka reaguar duke e quajtur vendimin një hakmarrje të paligjshme politike, në vazhdën e një përplasjeje të hapur ligjore me administratën Trump, e cila nisi muaj më parë pas mosmarrëveshjeve për financime federale dhe trajtimin e çështjeve të antisemitizmit në kampus.

Ky vendim vjen vetëm disa ditë pasi një gjykatë amerikane bllokoi përkohësisht përpjekjen e Departamentit të Sigurisë Kombëtare për të ndaluar praninë e studentëve të huaj në Harvard. Gjykata kishte dhënë dritë jeshile që studentët ndërkombëtarë të vazhdojnë studimet gjatë procesit ligjor.

Harvardi numëron rreth 7,000 studentë të huaj për vitin akademik 2024–2025, që përbëjnë 27% të totalit të studentëve. Vendimi i Trump krijon pasiguri për të ardhmen e tyre, ndërsa tensionet mes universiteteve elitare dhe Shtëpisë së Bardhë rriten, veçanërisht në klimën e protestave pro-palestineze dhe akuzave për antisemitizëm në kampuset universitare amerikane. / abcnews.al