Vuçiç: Radoiçiç nuk është kriminel, por ndiqet për Kosovën
Vuçiç: Radoiçiç nuk është kriminel, por ndiqet penalisht për Kosovën
Presidenti i Serbisë, Aleksandër Vuçiç, ka deklaruar se Milan Radoiçiç, i cili ka marrë përgjegjësinë për sulmin e armatosur ndaj Policisë së Kosovës në Banjskë të Zveçanit në vitin 2023, nuk po ndiqet penalisht për ndonjë krim në Serbi. Këtë e ka thënë gjatë një konference për shtyp në Beograd.
“Ju nuk thani pse Milan Radoiçiç është në njoftimin e kuq të Interpolit. Nuk është për shkak të ndonjë krimi, por për shkak të Kosovës dhe Metohisë. Dikush po e ndjek penalisht për çështjen e Kosovës dhe Metohisë, jo sepse ai është kriminel”, ka thënë Vuçiç.
Për Radoiçiçin është lëshuar një urdhërarrest ndërkombëtar nga Interpoli, me kërkesë të Kosovës. Megjithatë, autoritetet serbe nuk kanë ngritur aktakuzë kundër tij, edhe pse ai ka marrë përgjegjësinë për sulmin e armatosur, në të cilin u vra një polic i Kosovës. Gjatë këtij incidenti, u vranë edhe tre sulmues serbë.
Bashkimi Europian ka shprehur pritshmërinë që autoritetet në Serbi të arrestojnë dhe të ndjekin penalisht përgjegjësit për sulmin në Banjskë. Ndërkohë, Radoiçiçi ka vendbanim të regjistruar në Beograd dhe lëviz në mënyrë të lirë në Serbi.
Vuçiç ka hedhur poshtë informacionet jozyrtare, të cilat pretendojnë se Radoiçiçi dhe ish-partneri i tij i biznesit, Zvonko Veselinoviq, po mbrohen nga një pjesëtar i Xhandarmërisë serbe. “Pjesëtarët e Xhandarmërisë nuk duhet të ruajnë persona privatë”, ka thënë ai.
Të dy, Radoiçiçi dhe Veselinoviq, janë nën sanksionet e Shteteve të Bashkuara prej më shumë se katër vjetësh, për akuza që lidhen me krimin e organizuar dhe korrupsionin.
Me pak fjalë
Presidenti serb Aleksandër Vuçiç ka deklaruar se Milan Radoiçiç, i akuzuar për sulmin e armatosur në Banjskë, nuk po ndiqet penalisht në Serbi për krime të tjera, por për çështjen e Kosovës. Ndërkohë, autoritetet serbe nuk kanë ngritur aktakuzë kundër tij, pavarësisht se ai ka marrë përgjegjësinë për sulmin. Bashkimi Europian kërkon arrestimin e tij.
Personat e përmendur
Burimi i lajmit: opinion.al
Shënim: Ky material është përpunuar për qëllime informimi nga Portali Kosova.Today.
