Akuzat e Bardhit për Olsi Ramën dhe vendimi i SPAK, reagon kryeministri

Prokuroria e Posaçme ka vendosur që të mos nis procedim penal në drejtim të Gazment Bardhit, pas kallëzimit të bërë nga vëllai i kryeministrit Rama, për “kallëzim të rremë”.

Në vendimin e prokurorit, , thuhet se vendimi është marrë për shkak se në regjistrin e Prokurorisë nuk është regjistruar asnjë kallëzim nga Gazment Bardhi në drejtim të Olsi Ramës.

Lidhur me vendimin e SPAK, ka reaguar kryeministri Edi Rama, i cilia akuzon kryetarin e Grupit Parlamentar të PD, Gazment Bardhi si mashtrues, pasi sipas tij, ka gënjyer shqiptarët dhe gazetarin italian të “Rai 3”.

Rama shkruan se akuzat e Bardhit nuk janë kundër tij apo kundër vëllait të tij, por kundër Shqipërisë, pasi thotë kryeministri, në këtë mënyrë Shqipëria do të duket në sytë e të huajve si vend i “zi”.

Postimi i Ramës

“Kam bërë kallzim” po kallzim s’paska bërë thotë SPAK-u, ndërkohë që kallzimi që s’qenka bërë iu është shitur si sapun për djathë italianëve të atij emisionit të turpshëm për Shqipërinë, të cilëve letrat e kallzimit inekzistent të ulëritur në parlament u janë ofruar si akte gjyqësore! Hajde hajde ç’vete! Për të sulmuar Shqipërinë me duart e të huajve, ky soj shqiposh ka që në vitin 1912 që nuk le poshtërsi, sajesë, hile e gënjeshtër pa e nxjerrë jashtë kufijve të këtij vendi, po kjo historia e kallzimit të pakallzuar për t’i shpëtuar rrezikut të dënimit për kallzim të rremë është një nivel i ri pafytyrësie karshi publikut shqiptar, se palo burra që hedhin gurin e fshehin dorën ka parë plot kjo tokë, po soj burri që të ngrejë dorën sikur ka hedhur gurin, duke u hakërryer si të kishte vrarë shtatë zogj me atë gur që s’paska ekzistuar fare, nuk na kishin zënë akoma sytë! S’duhet të jetë burrë se s’ka mundësi, është thjesht çingije që ngre dorën duke kërcyer prehër më prehër sikur ka gur për të hedhur. Po s’ka shans që kjo gënjeshtër me fustan të shkurtër të mbetet pa dalë cullak faqe shqiptarëve, siç po dalin shpejt e shpejt cullak faqe italianëve edhe gënjeshtrat që ky soj shqiposh pa atdhe ia dha autorëve të atij emisionit skandaloz, për të kthyer në Itali kohën e vdekur kur Shqipëria ishte vend i zi dhe shqiptarët ishin delet e zeza të Europës! Ta harrojë kush e tenton, ajo kohë nuk kthehet më se Shqipërisë dhe shqiptarëve s’u drejtohet dot më askush si të ishin jetimë pa identitet e pa gojë.