Britani: Pesë të arrestuar nën dyshimet për komplot terrorist

Policia në Britani njoftoi të dielën arrestimin e pesë burrave nën dyshimin për përfshirje në vepra penale me karakter terrorist. Katër prej të arrestuarve janë shtetas iranianë, ndërsa kombësia e personit të pestë ende nuk është konfirmuar, shkruan DW, transmeton albinfo.ch.

Të dyshuarit, të moshës nga 29 deri në 46 vjeç, u ndaluan në operacione të koordinuara në Londër, Swindon dhe zonën e Mançesterit të Madh. Sipas një deklarate nga Policia Metropolitane e Londrës, arrestimet janë të lidhura me “një komplot të dyshuar për të synuar një lokal specifik”.

“Ky është një hetim që po zhvillohet me ritme të shpejta dhe jemi në kontakt të vazhdueshëm me autoritetet në zonën e prekur për t’i mbajtur të informuar,” deklaroi Dominic Murphy, shefi i njësisë kundër terrorizmit të Policisë Metropolitane.

Murphy theksoi se hetimi është ende në fazat e para dhe se aktualisht po shqyrtohen disa pista për të përcaktuar motivin e mundshëm, si dhe për të kuptuar nëse ekziston ndonjë rrezik i mëtejshëm për publikun.

Ndërkohë, policia vazhdon kërkimet në zona të ndryshme në Mançester, Londër dhe Swindon, ndërsa pesë të arrestuarit mbeten në paraburgim në pritje të zhvillimeve të mëtejshme hetimore, transmeton albinfo.ch.

The post Britani: Pesë të arrestuar nën dyshimet për komplot terrorist appeared first on Albinfo.