Kur pritet të nis punën qeveria e re e Gjermanisë?

Gjermania është një hap më afër formimit të një qeverie të re, pasi aleanca konservatore CDU/CSU dhe Partia Socialdemokrate (SPD) kanë rënë dakord të krijojnë një koalicion qeverisës dhe kanë zbuluar këtë javë marrëveshjen e tyre prej 146 faqesh, shkruan The Local.

Marrëveshja, e arritur më 9 prill – më pak se gjashtë javë pas zgjedhjeve federale të 23 shkurtit – sinjalizon kthimin e një koalicioni të njohur në historinë politike të vendit, të quajtur “zi-kuq”, një bashkëpunim mes konservatorëve dhe socialdemokratëve që është përsëritur disa herë në të kaluarën, transmeton albinfo.ch.

Pas rënies së papritur të qeverisë së koalicionit “semafor” në vjeshtën e vitit të kaluar, Gjermania u përfshi në një fushatë zgjedhore të shpejtë dhe intensive. Vetëm dy javë pas zgjedhjeve, nisën bisedimet formale mes CDU/CSU dhe SPD. Brenda pak javësh, palët arritën të miratojnë ligje kyçe që përfshijnë investime prej 500 miliardë euro në infrastrukturë dhe reforma të frenimit të borxhit për të rritur shpenzimet për mbrojtjen.

Përkundër ritmit të shpejtë, ende duhen disa hapa përpara se qeveria e re të hyjë zyrtarisht në detyrë dhe vendi të ketë kancelarin e ri.

14 prill – 3 maj: Pritet shpallja e emrave të ministrave
Ndërsa emrat për shumicën e posteve ministrore nuk janë zyrtarizuar ende, dihet se kryetari i CDU-së, Friedrich Merz, do të zëvendësojë Olaf Scholz-in si kancelar. Nga ana tjetër, SPD ka përzgjedhur Lars Klingbeil për Ministrinë e Financave dhe Boris Pistorius pritet të vazhdojë si Ministër i Mbrojtjes. Alexander Dobrindt i CSU mund të marrë drejtimin e Ministrisë së Brendshme, ndërsa Carsten Linnemann dhe Johann Wadephul përmenden si kandidatë për Ekonominë dhe Punët e Jashtme.

SPD ka paralajmëruar se nuk do të publikojë emrat e ministrave të saj para përfundimit të votimit të anëtarësisë, në fund të muajit prill.

28–30 prill: Votimi për marrëveshjen e koalicionit
CSU ka dhënë tashmë miratimin për marrëveshjen. CDU pritet ta bëjë këtë më 28 prill në një mbledhje të brendshme. Ndërkohë, SPD do të zhvillojë një votim të brendshëm me pjesëmarrjen e 358,000 anëtarëve të saj. Procesi do të zgjasë dy javë, duke u mbyllur më 29 prill, me shpalljen e rezultateve një ditë më pas.

1–3 maj: Nënshkrimi zyrtar i marrëveshjes
Nëse të gjitha partitë i japin dritën jeshile marrëveshjes, nënshkrimi zyrtar pritet të bëhet në fillim të majit, menjëherë pas rezultatit të votimit të SPD.

5–9 maj: Zgjedhja e kancelarit dhe betimi i qeverisë së re
Friedrich Merz ka shprehur synimin për t’u betuar si kancelar brenda javës që fillon më 5 maj. Bundestagu do të thirret në një seancë të posaçme, me gjasë më 7 maj, për të votuar kancelarin dhe kabinetin e ri. Të nesërmen, më 8 maj – një ditë simbolike që shënon fundin e Luftës së Dytë Botërore në Evropë – Merz pritet të mbajë fjalimin e tij të parë si udhëheqës i Gjermanisë, shkruan The Local.

Nëse ky afat kohor respektohet, Gjermania do të ketë një qeveri të re vetëm gjashtë muaj pas rënies së koalicionit të mëparshëm në nëntor. Kjo do të shënojë një kthim në stabilitetin politik dhe në një model të njohur bashkëqeverisjeje, në një kohë kur sfidat e brendshme dhe ato ndërkombëtare kërkojnë vendime të shpejta dhe të koordinuara, transmeton albinfo.ch.

The post Kur pritet të nis punën qeveria e re e Gjermanisë? appeared first on Albinfo.