Zvicra do të ashpërsojë masat ndaj shtetasve me nënshtetësi të dyfishtë që shmangin shërbimin ushtarak

Një marrëveshje e vjetër mes Bernës dhe Parisit, e lidhur në vitin 1997, i lejonte shtetasve me nënshtetësi të dyfishtë zvicerano-franceze të shmangnin shërbimin ushtarak në Zvicër, nëse ata merrnin pjesë në “Ditën e Mbrojtjes dhe Shtetësisë” në Francë (Journée défense et citoyenneté). Çdo vit, rreth 800 të rinj me shtetësi të dyfishtë përfitojnë nga kjo rregullore për të shmangur detyrimet ushtarake në Zvicër.

Mirëpo, përballë mungesës së rekrutëve dhe përkeqësimit të situatës së sigurisë në Evropë, autoritetet zvicerane fillimisht parlamenti, e më pas edhe Këshilli Federal kanë vendosur të rishikojnë këtë marrëveshje, transmeton albinfo.ch.

Qëllimi është që një kurs gjysmë-ditor teorik në Francë të mos konsiderohet më i mjaftueshëm për të përjashtuar një shtetas të dyfishtë nga shërbimi ushtarak zviceran. Zvicra do të kërkojë rinegocimin e marrëveshjes me Francën për këtë çështje.

Nisma për ndryshimin e marrëveshjes është ndërmarrë nga deputeti Pascal Schmidt nga Partia Popullore Zvicerane (SVP), i cili në shkurt 2025 dorëzoi një mocion parlamentar për këtë qëllim.

Sipas tij, qytetarët me shtetësi të dyfishtë duhet t’i nënshtrohen shërbimit ushtarak zviceran nëse trajnimet që marrin jashtë vendit nuk përmbushin standardet e Zvicrës siç ndodh me Francën.

Sipas Ministrisë franceze të Mbrojtjes, “Dita e Mbrojtjes dhe Shtetësisë” është një aktivitet gjysmë-ditor që synon të ndërgjegjësojë të rinjtë për rëndësinë e lirisë dhe ofron informacione mbi karrierat civile dhe ushtarake. Gjithashtu, ofron mbështetje për të rinjtë në vështirësi që kërkojnë orientim profesional.

Por kjo përvojë është shumë larg nga ajo që kërkohet në Zvicër, ku rekrutët duhet të përfundojnë 18 javë trajnim bazë dhe të marrin pjesë në gjashtë trajnime të përsëritura nga tri javë secili, përgjatë nëntë viteve.

“Personat me nënshtetësi të dyfishtë janë në një pozicion të favorshëm,” deklaroi Schmidt. “Vetëm në pesë vitet e fundit, ushtria zvicerane ka qenë me 5,000 rekrutë më pak, pikërisht për shkak të kësaj dispozite.”

Ai shtoi se nuk e imagjinon që shumica e parlamentit të dëshirojë të ruajë këtë situatë.

The post Zvicra do të ashpërsojë masat ndaj shtetasve me nënshtetësi të dyfishtë që shmangin shërbimin ushtarak appeared first on Albinfo.