Disa sjellje në të ngrënë që tregojnë se mund të keni çrregullimin ADHD

Nga Gazeta ‘Si’– Njerëzit me ADHD kanë vështirësi me të ngrënit duke anashkaluar vaktet dhe duke ngrënë shumë më vonë, ose duke ngrënë me tepri gjatë gjithë ditës.

Ndërsa vaktet e rregullta u sjellin dobi të gjithëve, ato janë veçanërisht të rëndësishme për ata me ADHD, tha Carol Brown, një terapiste e çrregullimeve të të ngrënit.

“Simptomat kryesore të ADHD-së ndikojnë në fushat kryesore të funksionimit të përditshëm, duke përfshirë përqendrimin, vendimmarrjen dhe rregullimin e emocioneve. Shtoni urinë në listë dhe është më e lehtë të përjetoni energji të ulët, nervozizëm dhe mjegullim të trurit”, tha ajo. Vaktet e vazhdueshme ndihmojnë në rregullimin e sistemit nervor, duke mbështetur fokusin dhe humorin.

Më poshtë janë gjashtë zakone që mund të jenë shenja të ADHD-së, sipas ekspertëve – por gjithmonë duhet të konsultoheni me një profesionist mjekësor.

Shenja 1: Hani vazhdimisht ushqime të shpejta

Njerëzit me ADHD shpesh përballen me tre faktorë kryesorë që nxisin ngrënien e ushqimeve të shpejta: sfida në funksionimin ekzekutiv, ndërgjegjësim i ulët interoceptiv dhe nivele më të ulëta të dopaminës.

“Kur funksionimi ekzekutiv i bën vaktet e rregullta të vështira për t’u menaxhuar, ushqimet e shpejta bëhen një alternativë më e lehtë. Me kalimin e kohës, ngrënia e parregullt mund të ndikojë në sinjalet e urisë, duke përforcuar ciklin e ngrënies së ushqimeve të shpejta dhe të paqëndrueshme”, tha Brown.

Shumë njerëz me ADHD nuk e vënë re urinë derisa energjia e tyre të ketë filluar të pakësohet, duke i bërë ata më të prirur të kërkojnë ushqime të shpejta me shumë karbohidrate dhe sheqer.

Shenja 2: Porositni ushqim nga jashtë

Përgatitja e vakteve përfshin aftësi të shumta ekzekutive të funksionimit.

Duhet të planifikoni se kur doni të hani, të hartoni një plan vaktesh, të organizoni një listë ushqimesh, të mbani një kuzhinë të rregullt dhe të përdorni aftësi të tjera të menaxhimit të kohës, thekson Brown. Nga ana tjetër, ushqimi me vete zvogëlon nevojën për këto aftësi.

Nëse po mendoni të pakësoni konsumin e ushqimit me porosi, filloni duke e qartësuar “pse-në” tuaj, qoftë për të kursyer para, për t’u përqendruar në shëndet apo për të ndërtuar më shumë vetëbesim në kuzhinë.

“Pasi ta dini arsyen, filloni me ndryshime të vogla”, tha Brown. “Për shembull, nëse doni të zhvilloni aftësi gatimi, mund ta pakësoni ngadalë konsumin e ushqimit me porosi dhe të përgatisni disa ushqime vetë.

Shenja 3: Shpesh hani me tepri

Shumë njerëz me ADHD kanë vështirësi të vënë re dhe t’u përgjigjen sinjaleve të urisë dhe ngopjes.

“Kjo, së bashku me mosfunksionimin ekzekutiv, mund ta bëjë të vështirë për njerëzit me ADHD të bëjnë diçka për të cilën shumica e njerëzve nuk duhet të punojnë aq shumë – si të hanë kur janë të uritur dhe të ndalen kur janë të ngopur”, tha Timothy Frie ,president i Akademisë Kombëtare të Neuronutricionit.

Kjo është një arsye pse njerëzit me ADHD mund të anashkalojnë pa dashje vaktet ose të hanë përtej pikës së ngopjes. Në vend që të përqendroheni te kufizimi, Frie rekomandon ndërtimin e një strukture mbështetëse rreth të ngrënit.

“Për disa njerëz, kjo mund të jetë vendosja e alarmeve ose kohëmatësve për t’u siguruar që po mbani orare të qëndrueshme të vakteve”.

Shenja 4: Shpesh blini produkte të freskëta me tepri dhe pastaj i lini të prishen në frigorifer

Shumë persona me ADHD nisin gatimin me qëllimet më të mira, vetëm për të humbur interesin kur vjen dita e duhur për ta bërë këtë.

“Ndonjëherë kjo lidhet me një dëshirë të përhapur për autonomi, një përvojë që mund ta bëjë dikë me ADHD të ndihet shumë i ndjeshëm ndaj të pasurit zgjedhje dhe moskufizimit të vetëm një zgjedhjeje”, shpjegon Grace Lautman , një këshilltare e licencuar për shëndetin mendor, nutricioniste e certifikuar.

Ajo shton se shërimi i marrëdhënies suaj me ushqimin ndërsa jetoni me ADHD gjithashtu përfshin shumë vetë-dhembshuri. Kjo mund të nënkuptojë t’i kujtoni vetes se është në rregull të mbështeteni në më shumë ushqime të ngrira.

Shenja 5: Keni tendencë të hani të njëjtin vakt derisa të iu mërzitet

“Të hash të njëjtën gjë çdo ditë mund të jetë një strategji fillestare e pavetëdijshme për t’u përballur me faktin se planifikimi dhe të menduarit për ushqime të reja për të bërë është shumë i lodhshëm për funksionin ekzekutiv”, tha Lautman.

Ndërsa është e rëndësishme të pranohet fakti që njerëzit me ADHD mund të mbështeten në zgjedhje të përsëritura ushqimore, shqetësimet lindin kur sasia e ushqimit është zvogëluar shumë ose kur eliminohen grupe të tëra ushqimore.

Kur një ushqim nuk është më tërheqës, eksploroni se cilat vakte të tjera mund t’ju duken të realizueshme.

Për të ndihmuar në ruajtjen e larmisë mendoni se cilat ushqime do të zgjidhnit nëse shqetësimet për imazhin e trupit, dietën ose perceptimet e jashtme nuk do të iu presiononin.

Shenja 6: Ju përjetoni ndjeshmëri shqisore

Njerëzit me ADHD shpesh kanë vetëdije të lartë shqisore, gjë që mund t’i bëjë teksturat, aromat dhe shijet e ushqimeve të caktuara të ndihen intensive ose të tepërta.

“Meqenëse të ngrënit përfshin shqisa të shumëfishta, të ngrënit mund të bëhet sfiduese”, tha Broën.

“Kjo mund të çojë në të ngrënit selektiv, ku njerëzit preferojnë ushqime më të qëndrueshme ‘të sigurta’ si makaronat, orizin ose bukën mbi ushqimet që kanë më shumë variacion në teksturë dhe shije.” Për disa, kjo shfaqet si një zgjedhje e lehtë, ndërsa për të tjerët, mund të kufizojë ndjeshëm llojet e ushqimeve që do të hanë.

Ja kur duhet të merrni në konsideratë diagnostikimin:

Ndikimi i ADHD-së në sjelljet e të ngrënit shpesh anashkalohet ose shpërfillet si mungesë vullneti ose disipline, por është shumë më tepër se kaq .

“Nëse problemet që lidhen me ushqimin janë kronike, si muaj të tërë ushqimesh të pahapura dhe të papërfunduara, vështirësi në përgatitjen e listave të ushqimeve ose planifikimin e vakteve, ose probleme të vazhdueshme me harresën për të ngrënë dhe ngrënien e tepërt, është një ide e mirë të merrni në konsideratë një vlerësim të ADHD-së”, tha Frie.

Burimi: Huffington Post/Përshtati Gazeta SI

The post Disa sjellje në të ngrënë që tregojnë se mund të keni çrregullimin ADHD appeared first on Gazeta Si.