Grupi i BEI-t do të rrisë investimet jashtë BE-së deri në 10 miliardë euro në vit, qasje do të kenë edhe vendet kandidate për në BE 

Grupi i Bankës Evropiane të Investimeve (BEI) ka miratuar orientimet strategjike për BEI Globale, krahun e saj të partneriteteve ndërkombëtare dhe të zhvillimit. Plani ka për synim sfidat globale dhe forcon zërin e Evropës në një peizazh gjeopolitik gjithnjë e në ndryshim. Ai përmirëson mbështetjen për projekte me ndikim të lartë në mbi 130 vende, në përputhje me nevojat lokale dhe prioritetet e BE-së, transmeton Portalb.mk.

Orientimi shërben si një udhërrëfyes për investimet e Grupit të BEI-t jashtë Bashkimit Evropian (BE), përgjatë fushave prioritare të përcaktuara qartë, siç janë energjia e pastër dhe transporti i qëndrueshëm, shëndeti global, arsimi më i mirë, projektet e infrastrukturës që forcojnë zinxhirët e furnizimit, dhe fuqizimi i grave. Do të rriten volumet e investimeve për infrastrukturën strategjike dhe zhvillimin e sektorit privat në Ukrainë, vendet e zgjerimit të BE-së dhe rajonet fqinje. BEI Globale do të vijojë angazhimin e saj të fortë për zbatimin e strategjisë “Global Gateway” të BE-së dhe për të çuar përpara ambiciet e saj për masat klimatike dhe qëndrueshmërinë mjedisore në kuadër të fazës së dytë të udhërrëfyesit të grupit të bankës për klimën.

“Në një botë me mure, ne ndërtojmë ura të reja”, tha presidentja e Grupit të BEI-t, Nadia Calviño. “Si një partner i fortë dhe i besueshëm, ne mbetemi të përkushtuar ndaj bashkëpunimit dhe ofrimit të zgjidhjeve të favorshme për të dyja palët.”

Nga viti 2025 deri në vitin 2027, Grupi i BEI-t do të ofrojë financim vjetor deri në 10 miliardë EUR, i cili do të përfshijë asistencë teknike në rritje për të forcuar pronësinë lokale dhe për të përshpejtuar përgatitjen dhe zbatimin e projekteve.

Procedurat e financimit do të thjeshtohen duke shfrytëzuar mbështetjen e ndërsjellë me bankat e zhvillimit dhe sinergjitë me partnerët e BE-së për të përshpejtuar investimet në projektet kryesore në mbarë botën. Grupi i BEI-t po bashkëpunon gjithashtu me Komisionin Evropian dhe palët e interesuara të BE-së për të thjeshtuar dhe përmirësuar mandatet nga buxheti i BE-së.

Zinxhirët e furnizimit dhe lëndët e para kritike

Orientimet strategjike parashikojnë zbatimin e instrumenteve të reja që u përshtaten realiteteve të sotme, duke mbështetur eksportuesit evropianë dhe duke diversifikuar zinxhirët e furnizimit.

Grupi i BEI-t po zhvillon një nismë të re mbarë-evropiane për tregtinë dhe investimet, për të kanalizuar garancitë dhe financimin e BE-së tek eksportuesit dhe kompanitë e BE-së që paraqesin oferta ndërkombëtare përmes rrjetit të agjencive kombëtare të kreditit të eksportit. Aktivitetet mbi lëndët e para kritike do të zgjerohen, duke u përqendruar në partneritetet strategjike midis BE-së dhe vendeve partnere për të forcuar zinxhirët e furnizimit të qëndrueshëm, thelbësorë për tranzicionin e gjelbër dhe digjital.

Prioritetet rajonale

Si krahu i financimit të BE-së dhe banka më e madhe shumëpalëshe e zhvillimit në botë, në pronësi vetëm të 27 shteteve anëtare të BE-së, Grupi i BEI-t luan një rol kyç në avancimin e objektivave të politikës së jashtme të Bashkimit. Duke vepruar kështu, BEI Globale do të zbatojë një qasje të diferencuar, duke i përshtatur aktivitetet e saj sipas gjeografisë dhe sektorit, sipas nevojave lokale, ndërkohë që mbetet plotësisht në përputhje me prioritetet dhe politikat e BE-së.

Në Ukrainë, Grupi i BEI-t ka ofruar 4 miliardë EUR mbështetje që nga fillimi i pushtimit rus, duke riparuar infrastrukturën kritike, duke rindërtuar shkolla, kopshte, spitale dhe duke siguruar furnizim me energji elektrike në vend. Grupi i BEI-t do të rrisë mbështetjen e tij për të financuar qëndrueshmërinë afatshkurtër, rimëkëmbjen pas luftës dhe anëtarësimin në BE.

Vendet kandidate për në BE do të kenë akses në të gjithë gamën e instrumenteve të BEI-t, nga produktet e investimeve të përshtatura deri te mekanizmat e ndarjes së rrezikut dhe asistenca teknike. Grupi i BEI-t do të përqendrohet në projekte strategjike të infrastrukturës për të përmirësuar lidhjen rajonale dhe integrimin e anëtarëve të ardhshëm të BE-së.

Në fqinjësinë e BE-së, fokusi do të jetë në stabilitetin dhe qëndrueshmërinë ekonomike lokale, energjinë e pastër, lidhjen fizike me BE-në dhe sigurinë energjetike. Grupi i BEI-t do të kontribuojë në zbatimin e strategjisë së Komisionit për Detin e Zi dhe të Paktit për Mesdheun. Konkretisht në Lindjen e Mesme, ne do të vazhdojmë të kontribuojmë në stabilitetin ekonomik dhe financiar dhe të mbështesim zgjidhjen me dy shtete.

Në Afrikën Nënsahariane, Grupi i BEI-t do të përqendrohet në infrastrukturat kyçe mbështetëse të nevojshme për zhvillim, si p.sh. shëndetësia, uji, aksesi në energji, transporti dhe përfshirja digjitale, duke mbështetur sektorin privat lokal dhe duke krijuar partneritete të forta fitimprurëse dhe aleanca strategjike për ndikim.

Në Amerikën Latine dhe Azi-Paqësor, fokusi do të jetë në zinxhirët kritikë të vlerave të BE-së dhe mbështetjen për integrimin rajonal, për shembull në fushat e transportit, energjisë dhe infrastrukturës digjitale.