Shea: Pa stabilitet politik në Kosovë, integrimi euroatlantik mbetet i vështirë
Shea: Pa stabilitet politik në Kosovë, integrimi euroatlantik mbetet i vështirë
Ish-zyrtari i lartë i NATO-s, Jamie Shea, ka vlerësuar se aktivizmi në Kongresin amerikan lidhur me anëtarësimin e Kosovës në aleancën ushtarake duhet parë si pjesë e një agjende afatgjatë, sesa si një ndikim të menjëhershëm. Sipas tij, kjo e mbron Kosovën në vëmendjen politike të Uashingtonit dhe hap rrugë për një mundësi të ardhshme, kur kushtet në marrëdhëniet Kosovë-Serbi dhe brenda vetë NATO-s të jenë më të favorshme.
“Por, sinqerisht, derisa të ketë stabilitet politik në Kosovë, sepse tri palë zgjedhje në 18 muaj nuk janë shenjë e mirë… ndaj, derisa të ketë më shumë stabilitet pas zgjedhjeve të qershorit, nuk pritet të ketë një rrugë të qartë përpara në procesin e integrimit euroatlantik”, ka thënë Jamie Shea për Radion Evropa e Lirë.
Kosova, në më pak se një muaj, do të mbajë zgjedhjet e treta parlamentare brenda një periudhe prej një viti e gjysmë, pasi dy ciklet e mëparshme nuk arritën të prodhojnë institucione të qëndrueshme, për shkak të mungesës së konsensusit mes partive politike.
Shea gjithashtu pajtohet se mbajtja nën presion e shteteve mosnjohëse është e rëndësishme, por thekson se Kosova nuk mund të mbështetet vetëm te SHBA-ja. Ai thekson nevojën për një qasje më të balancuar drejt Evropës.
“Kosova duhet të ketë një përpjekje më të balancuar lobimi dhe të lobojë po aq fort në Berlin, Paris, Londër apo Varshavë, sa edhe në Uashington. Mbështetja vetëm te Shtetet e Bashkuara mund të ketë funksionuar në të kaluarën, në vitet ‘90, por sot nuk është më një strategji efektive”, vlerëson ish-zyrtari i NATO-s.
Me pak fjalë
Sipas Jamie Shea, pa stabilitet politik në Kosovë, procesi i integrimit euroatlantik mbetet i vështirë. Ai thekson se zgjedhjet e shpeshta dhe mungesa e konsensusit ndërpartiak pengojnë avancimin e vendit drejt NATO-s, ndërsa një strategji e balancuar e lobimit në Evropë dhe SHBA është e nevojshme për të siguruar mbështetje të gjerë.
Personat e përmendur
Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.
