Studim në Bazel: Dushet e ftohta lidhen me më pak mungesa në punë

Dushet e ftohta mund të sjellin përfitime për mirëqenien dhe mjedisin, sipas një studimi të Universitetit të Bazelit. Gjatë eksperimentit, mungesat në punë për arsye shëndetësore u ulën mesatarisht me 31 për qind krahasuar me grupin e kontrollit.

Psikologia Lena Glaser përfshiu 719 persona të moshës 18–65 vjeç në një studim dymbëdhjetëjavor. Pjesëmarrësit duhej të ishin të shëndetshëm dhe të mos praktikonin më parë rregullisht dushe të ftohta, transmeton albinfo.ch.

Shumë u tërhoqën gjatë dy javëve të para. Ata që vazhduan raportuan përmirësim të mirëqenies fizike dhe psikologjike, si dhe ndjesi freskie e vigjilence pas dushit. Ulja e mungesave në punë, megjithatë, nuk duhet barazuar automatikisht me 31 për qind më pak sëmundje.

Studimi evidentoi edhe kursim energjie dhe ulje të emetimeve. Megjithatë, nuk dihet nëse pjesëmarrësit e vazhduan praktikën pas eksperimentit apo nëse sjellje të tjera e zvogëluan përfitimin mjedisor.

Sipas studiueses, ndryshimi nuk duhet të jetë domosdoshmërisht ekstrem: edhe përshtatjet e vogla të temperaturës mund të kenë vlerë, duke respektuar reagimin dhe mirëqenien e trupit.

The post Studim në Bazel: Dushet e ftohta lidhen me më pak mungesa në punë appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.