Biznesmeni i ri akuzohet për rrjet ndërkombëtar mashtrimesh me miliarda dollarë

Autoritetet amerikane kanë akuzuar biznesmenin 37-vjeçar Chen Zhi, një nga njerëzit më me ndikim në Kamboxhia, si drejtuesin e një prej organizatave kriminale më të mëdha transnacionale në Azi.

I njohur për pamjen e tij të re dhe për aktivitetet filantropike, Chen drejtonte Prince Group, një konglomerat gjigant me investime në pasuri të paluajtshme, banka, hotele dhe biznese luksoze. Por sipas hetuesve amerikanë, pas kësaj fasade fshihej një perandori mashtrimesh me kriptovaluta dhe punë të detyruar, që i sillte deri në 30 milionë dollarë në ditë.

Prokurorët në Nju Jork kanë sekuestruar 15 miliardë dollarë në kriptovaluta nga rrjeti i tij dhe pretendojnë se paratë përdoreshin për blerje veprash arti të Picassos, avionë privatë, prona në Londër dhe ryshfete për zyrtarë të lartë.

Chen, i lindur në provincën Fujian të Kinës, u vendos në Kamboxhia në vitin 2011 dhe fitoi shtetësinë përmes një donacioni prej 250 mijë dollarësh. Ai u bë këshilltar personal i ish-kryeministrit Hun Sen dhe më pas i djalit të tij, Hun Manet.

Sipas akuzave, Prince Group shërbente si mbulesë për mbi 100 kompani fiktive që pastronin para përmes 12 vendeve. Prokurorët thonë se Chen përdorte kampe pune të detyruar në Kamboxhia, ku punëtorët detyroheshin të kryenin mashtrime online nën kërcënimin e dhunës.

Aktualisht Chen është në arrati dhe nuk përballet me ndonjë rrezik ligjor në Kamboxhia, e cila nuk ka marrëveshje ekstradimi me SHBA-në.

The post Biznesmeni i ri akuzohet për rrjet ndërkombëtar mashtrimesh me miliarda dollarë appeared first on Ditar.al.