Netanyahu urdhëron sulme të fuqishme në Gaza, Izraeli akuzon Hamasin për shkelje të armëpushimit

Kryeministri izraelit Benjamin Netanyahu urdhëroi ushtrinë izraelite të ndërmarrë “sulme të menjëhershme dhe të fuqishme” në Rripin e Gazës, pasi Izraeli akuzoi Hamasin për shkelje të marrëveshjes së armëpushimit të ndërmjetësuar nga SHBA dhe për inskenimin e zbulimit të trupit të një pengu të ndjerë.

“Sipas përfundimeve të konsultimeve të sigurisë, kryeministri Netanyahu ka udhëzuar nivelin ushtarak të kryejë menjëherë sulme të fuqishme në Rripin e Gazës,” thuhet në një deklaratë të shkurtër nga zyra e tij.

Një burim ushtarak izraelit tha se Hamas kishte sulmuar trupa izraelite në lindje të të ashtuquajturës “vijë e verdhë”, që ndan pjesën e Gazës të pushtuar nga Izraeli nga territori i mbetur palestinez.

Ministri i Mbrojtjes, Israel Katz, paralajmëroi se Hamas “do të paguajë një çmim të rëndë” për sulmin ndaj forcave të mbrojtjes izraelite (IDF) dhe se Izraeli do të përgjigjet “me forcë të madhe”.

Më herët gjatë ditës, zyra e Netanyahut deklaroi se Hamas kishte shkelur “qartësisht” marrëveshjen e armëpushimit, pasi kishte kthyer në Izrael mbetje njerëzore që nuk i përkisnin asnjërit prej 13 pengjeve ende të zhdukur në enklavë.

Ushtria izraelite publikoi gjithashtu një video të regjistruar me dron, që sipas saj tregon militantë të Hamasit duke varrosur një trup të mbështjellë me pëlhurë të bardhë në qytetin e Gazës, e më pas duke inskenuar “zbulimin” e tij në prani të Kryqit të Kuq.

Në pamjet, tre persona shihen duke tërhequr pëlhurën e bardhë drejt një toke të sheshuar pranë një ndërtese dhe duke e mbuluar me dhe. Më pas, një buldozer e zhvendos dheun, ndërsa disa përfaqësues të Kryqit të Kuq mbërrijnë në vendngjarje dhe ndihmojnë në nxjerrjen e trupit. Ushtria izraelite deklaroi se videoja dëshmon përpjekjet e Hamasit për “të krijuar përshtypje të rreme mbi kërkimin e trupave të pengjeve”.

Pas njoftimit për sulme të reja, krahu i armatosur i Hamasit bëri të ditur se po shtyn dorëzimin e trupit të një pengu të ndjerë, që ishte gjetur në jug të Gazës, duke fajësuar “shkeljet izraelite”.

Grupi militant paralajmëroi gjithashtu se çdo përshkallëzim i ri nga Izraeli “do të pengojë operacionet e kërkimit dhe nxjerrjes së trupave të pengjeve izraelite të vrarë”.

Trupi që pritej t’i dorëzohej Izraelit përmes Kryqit të Kuq ishte gjetur në Nuseirat, në qendër të Gazës, nën rrënojat e një ndërtese ku Izraeli kishte zhvilluar një operacion shpëtimi në qershor të vitit 2024, përmes të cilit u liruan tre pengje izraelite.

Në atë kohë, Hamas pretendoi se pengje të tjera ishin vrarë gjatë operacionit, gjë që u mohua nga Izraeli dhe Shtetet e Bashkuara. Por CNN, përmes verifikimit të vendndodhjes së pamjeve filmike, konfirmoi se trupi ishte gjetur në të njëjtin objekt ku ndodhi operacioni i shpëtimit, duke ngritur dyshime të reja mbi numrin e viktimave izraelite gjatë misionit.

Sipas Ministrisë palestineze të Shëndetësisë, mbi 270 palestinezë u vranë dhe qindra u plagosën si pasojë e atij operacioni.

The post Netanyahu urdhëron sulme të fuqishme në Gaza, Izraeli akuzon Hamasin për shkelje të armëpushimit appeared first on Ditar.al.