Ibiza, qendër logjistike e mafies shqiptare për trafikimin e kokainës drejt Europës

Një hetim i përbashkët i Policisë Kombëtare dhe Guardia Civil në Spanjë ka zbuluar rolin strategjik që ka luajtur Ibiza në një rrjet ndërkombëtar trafiku droge të drejtuar nga mafia shqiptare. Sipas hetimeve, ishulli ishte kthyer në një pikë grumbullimi për kokainë dhe hashash që hidhej në det nga anije tregtare që vinin nga Amerika e Jugut dhe Maroku.

Sasitë e drogës, të fshehura në çanta të pajisura me GPS, mblidheshin nga skafe të fuqishme me tre motorë prej 300 kuaj-fuqi secili. Operacionet zhvilloheshin kryesisht gjatë natës për t’i shpëtuar vëzhgimit të forcave të sigurisë. Çdo lundrim mund të transportonte deri në 750 kilogramë drogë, e cila më pas fshihej në depo të kamufluara në Ibiza. Prej aty, ngarkesat dërgoheshin në Majorka, Valencia dhe vende të tjera të Europës. Hetimet tregojnë se kjo metodë është përdorur të paktën në 43 raste të ndryshme.

Organizata kriminale kishte ngritur një rrjet të plotë logjistik në ishull, me depo të fshehta për ruajtjen e sasive të mëdha të drogës dhe për transportin e mëtejshëm drejt kontinentit. Grupet përdornin edhe pajisje gjurmimi të vendosura në makinat e policisë për të shmangur kapjet.

Në një rast, këto masa sigurie u mundësuan atyre të zbarkonin gati dy tonë hashash pa u zbuluar.

Edhe pse autoritetet kanë sekuestruar 687 kilogramë kokainë, 2.5 tonë hashash dhe mbi 1.5 milionë euro, dokumentet e zbuluara tregojnë se rrjeti kishte trafikuar shumë më tepër: mbi 2 tonë kokainë dhe 5.6 tonë hashash vetëm në Majorka, me një qarkullim që kalonte 25 milionë euro.

Në disa nga paketimet e kokainës, policia gjeti etiketa me fotografinë e presidentit rus Vladimir Putin, një shenjë identifikuese që përdoret zakonisht nga rrjetet ndërkombëtare të drogës për të treguar origjinën e ngarkesës.

Droga që mblidhej në det transportohej në Ibiza, prej andej në Majorka dhe Valencia, e më pas përfundonte në duart e klaneve në lagje të njohura si Son Banya, La Soledat dhe Corea, për t’u shpërndarë më tej në Itali, Gjermani dhe Francë.

Operacioni i koduar “Enroque Bal/Manso” ka zbuluar një strukturë kriminale të paprecedentë, me lidhje të forta në Europën Lindore dhe me përfshirje të personave nga biznesi, sistemi ligjor dhe forcat e rendit.

Në krye të organizatës ndodhej Stefan Milojevic, një figurë e njohur e grupit të motoristëve United Tribuns, i konsideruar “krahu ekzekutiv” i mafies shqiptare në Spanjë. Ai kishte ngritur një linjë direkte trafiku nga Maroku drejt Ibizës, pa kaluar nga rrugët tokësore spanjolle.

Sipas përgjimeve të Guardia Civil, Milojevic e quante aktivitetin e tij “Champions League”, duke iu referuar shkallës së lartë të operacioneve. Hetuesit e përshkruajnë këtë rrjet si një “kompani kriminale logjistike”, me strukturë të plotë transporti, kontabiliteti dhe pastrimi parash.

Më shumë se 100 persona janë arrestuar në kuadër të operacionit, përfshirë figura me peshë brenda dhe jashtë sistemit. Ndër më të spikaturit është Faustino Nogales, inspektor i Policisë Kombëtare, i akuzuar për rrjedhje informacioni dhe për paralajmërimin e organizatës për bastisjet policore. Ai ndodhet në paraburgim, bashkë me avokatin Gonzalo Márquez, “trurin financiar” të skemës dhe vetë Milojevic.

The post Ibiza, qendër logjistike e mafies shqiptare për trafikimin e kokainës drejt Europës appeared first on Ditar.al.