Pas 4 dekadash, Nancy Pelosi i jep fund karrierës politike

Nancy Pelosi, e para dhe e vetmja grua që ka shërbyer si Kryetare e Dhomës së Përfaqësuesve të SHBA-së, ka njoftuar se nuk do të rikandidojë për zgjedhjet e ardhshme.

“E kam dashur me gjithë zemër shërbimin për San Franciskon dhe vendin tonë,” tha ajo në një video, duke shtuar se viti i ardhshëm do të jetë i fundit i saj në Kongres.

Pelosi, 85 vjeç, ka qenë një nga figurat më të fuqishme të politikës demokrate për më shumë se tre dekada. Ajo u zgjodh për herë të parë në vitin 1987 dhe bëri histori në vitin 2007 si gruaja e parë që mori postin e Kryetares së Dhomës.

Gjatë karrierës së saj, ajo ka drejtuar Partinë Demokrate në momente kyçe, përfshirë miratimin e reformës shëndetësore “Obamacare” dhe dy proceset kundër ish-presidentit Donald Trump. Pelosi është njohur për aftësitë e saj të forta negociuese dhe disiplinën që mbante brenda partisë.

Së fundmi, ajo ndihmoi në miratimin e një mase elektorale që forcon pozitën e demokratëve në Kaliforni. Vendimi për t’u tërhequr vjen pas gati 40 vitesh shërbimi, gjatë të cilave ajo ka ndikuar në drejtimin e shtatë presidentëve amerikanë dhe ka lënë një trashëgimi të thellë për gratë në politikë.

Në përfundim të deklaratës, ajo u shpreh:
“San Francisko, njih fuqinë tënde. Kemi bërë histori dhe duhet të vazhdojmë ta bëjmë, duke mbrojtur idealet e demokracisë amerikane.”

The post Pas 4 dekadash, Nancy Pelosi i jep fund karrierës politike appeared first on Ditar.al.