Trump vendos tarifa më të larta ndaj Kanadasë

Presidenti Donald Trump njoftoi përmes një postimi në platformën Truth Social, se do të rrisë me 10 për qind tarifat ndaj Kanadasë. Ky vendim vjen si reagim ndaj një fushate reklamuese prej 75 milionë dollarësh kanadezë në Ontario, e cila përdorte citime të ish-presidentit Ronald Reagan për të kritikuar politikat tregtare të Trump-it.

Të enjten, Trump ndërpreu negociatat tregtare me Kanadanë, duke pretenduar se reklama e kishte shtrembëruar qëndrimin e Reagan-it për tarifat, një nga shtyllat kryesore të politikës së tij ekonomike. Kryeministri i Ontarios, Doug Ford, njoftoi se reklama do të hiqej në fundjavë, por presidenti u zemërua pasi ajo u transmetua gjatë ndeshjes së parë të World Series.

“Ronald Reagan i donte tarifat për arsye të Sigurisë Kombëtare dhe të Ekonomisë, por Kanadaja tha që nuk ishte e vërtetë!” shkroi Trump. “Reklama duhej të hiqej menjëherë, por ata e lanë të transmetohej mbrëmë gjatë World Series, duke e ditur që ishte mashtruese.”

Trump është përqendruar tek kjo fushatë reklamuese e bazuar te Reagan për të shprehur zemërimin e tij ndaj Kanadasë. Megjithatë, drejtori i Këshillit Kombëtar Ekonomik, Kevin Hassett, tha se reklama nuk është arsyeja e vetme e ftohjes së papritur në marrëdhëniet tregtare.

“Në fakt, negociatat me kanadezët nuk kanë qenë aspak miqësore,” deklaroi Hassett për Fox News të premten. “Nuk po ecin mirë, dhe presidenti është shumë i zhgënjyer.”

Mark Carney, i cili ka kërkuar të ndërtojë një marrëdhënie më të ngrohtë me Shtëpinë e Bardhë sesa ajo që kishte Trump me ish-kryeministrin Justin Trudeau, po përpiqet të ulë tensionet. Carney e kishte nxitur kryeministrin e Ontarios të tërhiqte reklamën për të rifilluar bisedimet tregtare dhe të premten u shpreh i gatshëm për t’i vazhduar aty ku kishin mbetur.

Ndërkohë, ministri kanadez i Tregtisë me SHBA-në, Dominic LeBlanc, deklaroi se Kanadaja mbetet e përkushtuar për të ndërtuar mbi përparimin e bërë në “diskutimet konstruktive” deri më tani.

“Do të vazhdojmë të fokusohemi në arritjen e rezultateve që sjellin përfitime për punëtorët dhe familjet në të dy vendet,” tha LeBlanc në një deklaratë të së shtunës mbrëma. “Kjo arrihet më së miri përmes bashkëpunimit të drejtpërdrejtë me administratën amerikane, që është përgjegjësi e qeverisë federale.”

The post Trump vendos tarifa më të larta ndaj Kanadasë appeared first on Ditar.al.